Trump refuzoi propozimin fillestar, Irani gati të paraqesë planin e ri të paqes me SHBA-në

Sipas CNN, burimet raportojnë se ndërmjetësit në Pakistan po presin propozimin zyrtar iranian, ndërsa Ministri i Jashtëm iranian, Abbas Araghchi, është kthyer sot në Teheran pas vizitës së tij në Rusi, për të zhvilluar konsultime me udhëheqësinë iraniane.

Procesi i vendimmarrjes po ecën ngadalë, për shkak të vështirësive në komunikimin me udhëheqësin suprem, vendndodhja e të cilit mbetet e fshehtë.

Sipas burimeve, Trump e ka bërë të qartë se nuk e pranon propozimin fillestar iranian, i cili parashikonte ndërprerjen e armiqësive dhe, në një fazë të dytë, zgjidhjen e çështjeve më komplekse të programit bërthamor të Teheranit.

Procesi përshkruhet si fluid, me rezultatin që varet nga një propozim i rishikuar nga Irani, i cili mund të konsiderohet më i pranueshëm për Uashingtonin.

Në një postim në rrjetet sociale, Trump tha se Irani e kishte informuar SHBA-në se ndodhej në një “gjendje kolapsi”, duke pretenduar se Teherani po kërkonte hapjen e Ngushticës së Hormuzit ndërsa përpiqej të zgjidhte çështjet e lidershipit të tij.