Berisha paralajmëron “Shqiponjat” dhe RENEA: Do të përgjigjeni një për një para ligjit

Kryetari i Partisë Demokratike, Sali Berisha, ka akuzuar efektivët e forcave “Shqiponja” dhe RENEA për ushtrim dhune ndaj protestuesve gjatë tubimit të zhvilluar në Tiranë. Në një deklaratë për mediat, ai paralajmëroi se punonjësit e policisë që, sipas tij, kanë kryer shkelje, do të mbajnë përgjegjësi individuale përpara ligjit.

Berisha e cilësoi situatën e krijuar në kryeqytet si një “ditë dhe natë terrori”, duke ngritur pretendime për përdorim të tepruar të forcës dhe mjeteve policore kundër demonstruesve.

Një prej rasteve ku u ndal kreu i opozitës ishte ai i Erjon Vishkurtit, për të cilin deklaroi se ka humbur shikimin në njërin sy gjatë protestës.

“Erjon Vishkurti humbi syrin. I diplomuar në gazetari, ndërkohë që në absolute nuk po kryente asnjë veprim të dhunshëm ndaj askujt”, u shpreh Berisha.

Sipas tij, gjatë përplasjeve janë plagosur edhe protestues të tjerë, mes tyre një vajzë që ka pësuar dëmtime në sy dhe një person që është goditur në zonën mbi vetull. Berisha pretendoi gjithashtu se një tjetër protestues ka marrë goditje në abdomen dhe ka nevojë për ndërhyrje kirurgjikale.

Akuzat për dhunë dhe shoqërime të paligjshme

Kreu i PD-së ngriti akuza edhe për trajtimin e protestuesve nga efektivët e policisë, duke pretenduar se disa prej tyre janë goditur ndërsa ndodheshin të shtrirë në tokë. Ai foli gjithashtu për shoqërime që i cilësoi të paligjshme në komisariate.

Në deklaratën e tij, Berisha përmendi edhe rastin e 40-vjeçarit Lorenco Bezani, për të cilin pretendoi se është goditur me shkelma në kokë dhe në trup, ndonëse, sipas tij, nuk po kryente veprime të dhunshme.

Një tjetër akuzë e ngritur nga opozitari lidhej me sjelljen e disa efektivëve ndaj vajzave të shoqëruara me automjete policie. Megjithatë, në deklaratën e bërë publike nuk u paraqitën hollësi apo prova që të mundësonin verifikimin e pavarur të këtyre pretendimeve.

“Unë i garantoj shqiponjat e Edi Ramës, banditë të Edi Ramës, shqiponja apo çfarëdo jenë, se akti i parë i përmbysjes, i largimit të padronit të tyre, ato një për një do të përgjigjen para ligjit për krime të shëmtuara”, deklaroi Berisha.

Ai theksoi se çdo punonjës që mund të ketë kryer vepra penale duhet të përgjigjet individualisht, ndërsa paralajmëroi edhe ndryshime në strukturat e Policisë së Shtetit në rast të largimit të qeverisë.

Deklaratat e kreut të PD-së vijnë pas protestës së shoqëruar me përplasje mes demonstruesve dhe forcave të policisë, gjatë së cilës u përdorën gaz lotsjellës, autobot me ujë dhe mjete të tjera të forcës.