EDI RAMA SHPERBLEN ULSI MANJEN, E UL NE KARRIGEN E ZEVENDESKRYEMINISTRIT-KUPOLA

Asambleja Kombëtare e Partisë Socialiste, që do të mblidhet më 14 nëntor, pritet të shoqërohet me lëvizje të rëndësishme në kabinetin qeveritar.

Një nga emrat që po përmendet për një pozicion të ri në qeveri është Ulsi Manja, i cili, sipas informacioneve që qarkullojnë në media dhe në radhët e mazhorancës, mund të marrë postin e zëvendëskryeministrit.

Manja, aktualisht kryetar i Komisionit parlamentar të Ligjeve dhe ish-ministër i Drejtësisë, shihet si një prej figurave që mund të marrë më shumë përgjegjësi në ekzekutiv.

Afrimi i tij me kabinetin lidhet me dy arsye kryesore: raportet që ka ndërtuar me përfaqësues të strukturave të drejtësisë, përfshirë prokurorë të SPAK-ut, si dhe nevojën e kryeministrit Edi Rama për të forcuar profilin juridik të qeverisë.

Në një moment kur mazhoranca po përgatitet për një përballje të re publike dhe për hartimin e një pakete reformash institucionale, përfshirja e një figure me përvojë në fushën e drejtësisë mund të shihet si pjesë e strategjisë së re qeverisëse.

Lëvizja e mundshme e Manjës do të ishte një nga ndryshimet më të rëndësishme në kabinet, duke i dhënë atij një rol më të drejtpërdrejtë në koordinimin e punës së qeverisë.

Megjithatë, deri në mbledhjen e Asamblesë, këto mbeten skenarë që qarkullojnë brenda mazhorancës dhe nuk janë konfirmuar zyrtarisht nga kryeministri.