“Nuk ka antidot për propofolin”/ Vdekja e Mazonakis, dalin mesazhet e WhatsApp

Detaje të reja po dalin në dritë lidhur me vdekjen e këngëtarit të njohur grek Giorgos Mazonakis, i cili ndërroi jetë më 9 shtator 2026, në moshën 54-vjeçare, pasi pësoi arrest kardiak gjatë një procedure mjekësore në një klinikë private në Athinë.

Emisioni investigativ “Live News” në televizionin grek MEGA ka publikuar dëshmi të pjesëtarëve të shërbimit të urgjencës EKAB, si dhe biseda në WhatsApp që kanë ngritur pikëpyetje mbi medikamentet e administruara dhe informacionin që iu dha ekipit mjekësor gjatë ndërhyrjes.

Sipas dëshmive, personeli i urgjencës që mbërriti në klinikën në rrugën Karneadou, në zonën e Kolonakit, pretendon se nuk mori informacion të plotë mbi gjendjen e këngëtarit dhe trajtimin që kishte marrë përpara mbërritjes së ambulancës.

Një prej shpëtimtarëve ka treguar se, kur pyeti mjekun se prej sa kohësh pacienti ndodhej në arrest kardiak, mori përgjigjen se kishin kaluar rreth dhjetë minuta.

Po sipas dëshmisë së tij, fillimisht personeli i klinikës deklaroi se Mazonakis i ishte administruar vetëm adrenalinë, pa përmendur medikamente të tjera.

Një nga elementet më të rëndësishme të hetimit lidhet me mesazhet e shkëmbyera në WhatsApp nga sekretarja 28-vjeçare e klinikës, të cilat janë publikuar nga mediat greke.

Në këto biseda përmendet propofoli, një medikament që përdoret për anestezi dhe qetësim. Në njërin prej mesazheve, sekretarja pretendon se ekipit të urgjencës nuk i ishte treguar se këngëtarit i ishte administruar një qetësues.

“Nuk ka antidot për propofolin”, thuhet në një prej mesazheve të publikuara. Kur bashkëbiseduesi e pyet nëse pacientit i ishte dhënë qetësues, sekretarja përgjigjet se ishte kryer sedacion, por se shpëtimtarët nuk ishin informuar për këtë.

Mesazhet përmbajnë edhe diskutime mbi përgjegjësi të mundshme penale, por ato nuk provojnë në vetvete se cilat medikamente shkaktuan vdekjen e këngëtarit.

Nga klinika drejt spitalit

Sipas dëshmive të ekipit të urgjencës, Mazonakis u gjet në një pozicion të papërshtatshëm mbi shtratin e klinikës. Shpëtimtarët ndërhynë menjëherë për të vijuar përpjekjet e reanimimit.

Këngëtari u transportua më pas drejt spitalit “Elpis”, ku mjekët konstatuan vdekjen e tij, pavarësisht përpjekjeve për ta rikthyer në jetë.

Mazonakis kishte shkuar në klinikë për t’iu nënshtruar plazmaferezës, një procedure mjekësore që përfshin ndarjen, përpunimin dhe rikthimin e plazmës së gjakut në organizëm.

Ndërkohë, hetuesit po shqyrtojnë nëse klinika kishte autorizimet e nevojshme për kryerjen e kësaj procedure, si dhe mënyrën e sigurimit të medikamenteve të përmendura në dosje.

Dy mjekët e lidhur me klinikën, Ioanna Gaka dhe Ilias Theodoropoulos, janë përballur me akuza penale për vdekjen e këngëtarit. Të dy i kanë mohuar akuzat dhe kanë kundërshtuar përgjegjësinë për ngjarjen.“Nuk ka antidot për propofolin”/

Hetimet vijojnë për të përcaktuar se cilat substanca iu administruan Mazonakis, nëse pati vonesa në ndërhyrjen mjekësore dhe nëse trajtimi u krye në përputhje me protokollet përkatëse.

Dëshmitë dhe komunikimet e publikuara nga mediat greke përbëjnë pjesë të materialeve që po shqyrtohen nga drejtësia, ndërsa përgjegjësia për vdekjen e artistit mbetet për t’u përcaktuar nga gjykata.