BE thyen heshtjen për zhvillimet në Kosovë: Kushtetuesja vendos

Bashkimi Evropian ka reaguar pas konstituimit të Kuvendit të Kosovës dhe formimit të Qeverisë së re, duke theksuar se çështja e kushtetutshmërisë së këtyre vendimeve i takon Gjykatës Kushtetuese.

Një zëdhënës i Komisionit Evropian tha për Radion Evropa e Lirë se BE-ja është në dijeni të votimeve të zhvilluara të dielën, më 13 shtator, si dhe të kërkesës së paraqitur në Gjykatën Kushtetuese për shqyrtimin e ligjshmërisë së konstituimit të institucioneve të reja.

“Jemi në dijeni të votimeve të së dielës, si dhe vendimeve për konstituimin e Kuvendit dhe formimin e Qeverisë. Gjithashtu, jemi në dijeni edhe për kërkesën e paraqitur në Gjykatën Kushtetuese lidhur me kushtetutshmërinë e këtyre vendimeve. I takon Gjykatës Kushtetuese të shprehet për kërkesën e paraqitur”, deklaroi zëdhënësi.

BE-ja nënvizoi gjithashtu nevojën që Kosova të ketë institucione “plotësisht të konsoliduara”, me qëllim avancimin e reformave dhe të procesit të integrimit evropian, përfshirë zbatimin e Planit të Rritjes për Ballkanin Perëndimor.

Në seancën konstituive të së dielës u zgjodhën disa prej nënkryetarëve të Kuvendit, ndërsa kryetarja Albulena Haxhiu e shpalli Kuvendin të konstituuar edhe pse nuk u zgjodh nënkryetari nga radhët e Partisë Demokratike të Kosovës.

Pak orë më vonë, Kuvendi votoi Qeverinë e re të drejtuar nga Albin Kurti. Seanca u bojkotua nga PDK, LDK dhe Aleanca, ndërsa në votim morën pjesë deputetët e Vetëvendosjes dhe përfaqësuesit e komuniteteve joshumicë.

Pas këtyre zhvillimeve, PDK-ja iu drejtua Gjykatës Kushtetuese, duke kërkuar vendosjen e një mase të përkohshme ndaj Kuvendit të ri deri në shqyrtimin e çështjes së kushtetutshmërisë.

Deputetët Arian Tahiri dhe Përparim Gruda, së bashku me avokatin Faton Fetahu, dorëzuan ankesën në emër të PDK-së. Ata argumentuan se Vetëvendosje ka shkelur afatin kushtetues prej 30 ditësh për konstituimin e Kuvendit, si dhe procedurat për thirrjen e seancave.

Sipas një aktgjykimi të mëparshëm të Gjykatës Kushtetuese, Kuvendi duhet të konstituohet brenda 30 ditësh nga certifikimi i rezultateve. Ky afat kishte përfunduar më 7 gusht 2026.