Politike

Belshi është modeli ynë i zhvillimit rural

Pas asfaltimit të rrugëve në 5 lagjet kryesore të Belshit, tani bashkia e është e fokusuar në sistemimin dhe asfaltimin e rrugëve të fshatrave. Janë asfaltuar rrugët në 12 fshatra, rreth 20 km rrugë gjithësej, ku përfitojnë rreth 11 mijë banorë ndërsa projekti do të vijojë edhe në fshatra të tjerë.

Kryetari i Grupit Parlamentar Socialist Taulant Balla, deputeti Musa Ulqini dhe Kryetari i Bashkisë Arif Tafani ishin në fshatrat Turbull dhe Gjinuk ku inspektuan përfundimin e punimeve ndërsa biseduan edhe me banorët të cilët prej shumë kohësh i kërkonin këto investime.

“Belshi është modeli ynë i zhvillimit rural. Pas përfundimit të akseve kryesore, që janë arteria e zhvillimit të Belshit, tashmë jemi në fazën përfundimtare, atë të sistemimit dhe asfaltimit të rrugëve brenda fshatrave. Këto dy fshatra, që kanë përfunduar, janë pjesë e një projekti të madh që do të vazhdojë edhe në fshatra të tjerë, sepse qëllimi ynë është, që zhvillimi i agroturimit në zonën e Belshit, të bashkëshoqërohet edhe me vijimin e investimeve në çdo fshat.

Ne do të gjendemi pranë çdo fshati të Belshit sepse mendojmë që kjo zonë po merr një rëndësi përsa i përket zhvillimit të turizmit rural. Ftoj çdo shqiptar të vizitojë këtë destinacion të rëndësishëm turistik” u shpreh Balla.

Kryetari i Bashkisë tha se projekti nuk do të ndalet, por do të vijojë në çdo fshat të Belshit:

“Sapo kemi përfunduar asfaltimin e 800 m rrugë të brendshmë të fshatrave. Pas projektit të rikonstruksionit të Dumresë dhe pas përfundimit të segmentit rrugor Cerrik-Urë Vajgurore, bashkia po punon për zbatimin e projektit të sistemimit dhe asfaltimit të rrugëve të brendshme të fshatrave. Këtu jemi në Turbull dhe projekti vazhdon në disa fshatra të tjerë.”

Për banorët e fshtrave rruga nuk është vetëm një mundësi më e mirë lëvizje, por mundësi zhvillimi duke nisur nga dalja e produkteve bujqësore në treg më shpejt e me më pak kosto, e deri tek zhvillimi i agoturizmit, që duket se është një perspektivë e qartë për fshatrat e Dumresë.

Politike

Përballja Meta-Rama/ Peshëngritësi kundër basketbollistit

Ilir Meta, ish-president, ish-kryeministër, ish-kryetar i Kuvendit, kryetar aktual i Partisë së Lirisë është i ftuar në emisionin “Opinion”. Meta ka qenë në qendër të vëmendjes ditët e fundit për shumë gjëra. Pas largimit nga Presidenca, pas një sërë aktivitetesh për një periudhë të gjatë kohe ishte thuajse inekzistent në jetën e përditshme, më pas është shfaqur në një formë që ka befasuar rrjetet sociale. Ndjekja e tij në rrjetet sociale, angazhimi ose përqasja e njerëzve ndaj profilit të tij është rritur shumë por njëkohësisht postimet e tij kanë ngjallur një diskutim dhe një lloj habie.

Në përfundim të intervistës së Ilir Metës në “Opinion” në Tv Klan, gazetari Blendi Fevziu shkoi drejt tij për të regjistruar një videomesazh për kryeministrin Rama. Meta tha se është i hapur jo vetëm për debat, por edhe të vendosin një kosh basketbolli pasi sipas tij, Rama ka bërë vetëm faull. Në fund, Meta pati edhe një paralajmërim për Ramën.

Blendi Fevziu: Ky është një mesazh nga “Tarzani” dhe “Spiderman”-i i politikës, Ilir Meta për Edi Ramën. Çfarë do i thoshe Ramës zoti Meta?

Ilir Meta: Së pari nuk kam asnjë mesazh. Jam i hapur në çdo kohë këtu meqë përmendët “Tarzanin” dhe “Spiderman”-in, ai ka qenë basketbollist, unë kam qenë peshëngritës. Në çdo kohë jam gati këtu edhe për debat, por jam gati edhe ju të vini një kosh basketbolli.

Blendi Fevziu: Ta merr ai në basketboll.

Ilir Meta: Basketboll ai?

Blendi Fevziu: Po.

Ilir Meta: Ku ka bërë kosh ai ndonjëherë në basketboll, vetëm faull ka bërë. Ai kosh? Ai në basketboll ishte vetëm sepse ishte i gjatë, një, dhe e dyta ai kosh ka bërë vetëm kur ishte kryetar bashkie sepse gjuante 20 herë, bënte një kosh dhe atë e jepte në media.

Blendi Fevziu: Unë mesa di, jeni njohur te palestra e forcës të dy, ai bënte edhe ngritje peshash.

Ilir Meta: Po, vinte bënte me profesorin e ndjerë Feti Botorvën. Nuk dua të flas për këtë gjë. Edi, 4 milionë shqiptarë plus. Të jap fjalën! Edi, unë jam ai që të mora me pahir që s’më vije te parku “Rinia” se të merrnin të gjithë të fortët dhe Fatosi në telefon, mban mend apo jo? Edhe nuk kam ndryshuar Edi! Edi! Edi, jam mirë Edi!

Blendi Fevziu: Kam frikë se do të pyesë a është mirë Ilir Meta…qenka mirë!

Ilir Meta: Pa merak fare! Edi, shumë shpejt do të këmbehesh me Fredin! Mirupafshim!

Politike

Ilir Meta konfirmon motivacionin e Berishës për “non gratën”

Ilir Meta ka konfirmuar, ndofta pa dashje, sentencën e shpalljes së Sali Berishës të shpallur nga SHBA-të si shantazhues i drejtësisë dhe minues i drejtësisë.

Meta ka treguar një episod se si e kishte thirrur Sali Berisha në zyrë dhe pasi kishte lëshuar epitetet e duhura ndaj Ina Ramës, i kishte thënë atij të bënte kujdes se ajo kishte marrë porosi për ta futur në burg, sepse kishte çuar edhe audio-përgjimet për t’i verifikuar në Angli.

Sipas Metës, ai e kishte qetësuar Doktorin se nga burgu do t’i jepte më shumë vota nga jashtë tij dhe gjithçka bëhej për të inatosur dhe shqetësuar Berishën.

Ky fragment i marrë në kontekstin e përgjithshëm të kohës, tregon se si është sjell kryeministri Berisha ndaj akuzave për korrupsion ndaj bashkëpunëtorit të tij të afërt qeverisës, ashtu sikurse duket një sentencë e qartë e arsyes së shpalljes së tij “Non grata” si shantazhues i drejtësisë.

Meta duket se e tregoi këtë detaj për të rrëfyer besnikërinë e Berishës ndaj tij, por, në fakt, një bisedë e tillë e zhvilluar në zyrat e shtetit nga dy zyrtarë të lartë shtetëror nuk asgjë asgjë më pak veçse shpërdorim i besimit të publikut me funksionin shtetëror.

Politike

Meta: Gjatë fushatës më kanë rrëmbyer djalin 17 vjeç

I ftuar në studion e “Opinion” në TvKlan, Ilir Meta ka folur lidhur me mandatet e fituara me “gjak dhe sakrifica” siç e ka quajtur ai.

Meta ka rrëfyer se gjatë fushatës i kanë rrëmbyer dhe dhunuar djalin 17-vjeçar në Berat dhe Fier.

Sipas tij në Fier djali është dhunuar me lopata në kurriz, ndërsa në Berat djali është rrëmbyer nga bandat e këtij qyteti.

Pjesë nga diskutimi:

Meta: Vajta në Lezhë dhe më ndiqnin bandita, në Berat më rrëmbyen çunin 17 vjeç, ma rrëmbyen bandat e Beratit, u shkova atje në fole ku e kishin ata dhe e liruan.

Vajta në Fier i ranë çunit 17 vjeç me lopatë në kurriz ata. Ato mandate u morën me gjak dhe me sakrifica.

Fevziu: Dhe ju ja dhuruat Edi Ramës

Meta: Jo ja dhuruan ata jo unë

Politike

Dosja Beleri/ Rama: Nuk duam estradë ballkanike me gërhama nacionaliste në rajon

Kryeministri Edi Rama ka deklaruar në emisionin “Real Story” , se nuk duan konflikte dhe as estradë ballkanike me gërhama nacionaliste në rajon. Sipas tij, Greqia një nga partnerët strategjikë të Shqipërisë, pasi me të na lidh historia, fqinjësia dhe e ardhmja.

Sakaq, Rama ka theksuar nga Parisi se nuk e pranojmë dot të trajtohemi pa respekt, pasi gjithçka është reciproke.

Pjesë nga intervista:

\Folët për ndryshimin e klimës në grupin e vendeve skeptike ndaj Shqipërisë, ku padyshim Holanda mban vendin e parë, Franca të dytin por padyshim edhe vende të tjera përfshi edhe Gjermaninë. Sot raportet e Shqipërisë, e qeverisë tuaj, me vendet e BE janë të shkëlqyera, përjashto Greqinë.

Rama: Është një moment, është një moment që do kalojë. Shqipëria është sot një vend, me një profil, besoj unë të qartë që duhet ta konsolidojmë në vazhdim. Ne duam miqësi me të gjithë miqtë, ne duam absolutisht jo vetëm miqësi por duam partneritet strategjik me Greqinë me Italinë, me Turqinë. Ne nuk duam konflikte, ne nuk duam sherr, ne nuk duam estradë ballkanike me gërhama nacionaliste në rajon, ne duam të kemi sa më shumë kushte për të promovuar paqen bashkëpunimin etj etj. Një gjë nuk e pranojmë dot dhe nuk do ta pranojmë që të trajtohemi pa respekt. Për sa kohë trajtohemi me respekt, për sa kohë trajtohemi me të njëjtin respekt që japim ne jemi në rregull.

Pra, ju thoni që Greqia ka munguar në respekt ndaj nesh?

Rama: Jo, jo, jo.. Në rastin e Greqisë ne e kemi bërë shumë të qartë, që në krye të herës. Greqia është një nga partnerët strategjikë të Shqipërisë, me Greqinë na lidh historia, na lidh fqinjësia, na lidh e ardhmja. Unë e kam thënë hera herës diçka që në fakt nuk ka nevojë as të përsëritet dhe që të gjithë do ta kenë parasysh, fqinjin nuk e zgjedh, fqinjin e ke. Gjyshja ime, ndjesë pastë, thoshte fqinj i mërzitur, shtëpi e sekëlldisur. Pra, nëse fqinjësia ushqen sekëlldi dhe ushqen mërzi nuk është e mirë. Greqia ka marrë një pozion të caktuar në këtë periudhë kohe, ne nuk kemi reaguar përvec se kemi nënvizuar faktin që ne nuk lëvizim, nuk lëvizim nga pozicioni ynë për arsyen e thjeshtë se ne këtë pozicion nuk e kemi marrë në raport me Greqinë, nuk e kemi marrë në raport me një individ, ne këtë pozicion e kemi marrë në raport me veten dhe me të ardhmen që është pozicioni që Shqipëria duhet të ketë një drejtësi të pavarur. Dhe nëse ne nuk lëvizim nga ky pozicion për shumë raste që lidhen me qytetarë të Republikës së Shqipërisë me kombësi shqiptare ne nuk kemi pse të lëvizim për një qytetar të Republikës së Shqipërisë me kombësi greke, apo me kombësi franceze është e njëjta gjë.

Ju thatë që kjo është një situatë që ju do ta zgjidhni, si do ta zgjidhni? Keni deklaruar se do pritet fundi i gjyqit. Tashmë aty kemi një kryetare bashkie që për fat mori vota për të cilat kishte nevojë Himara, edhe nga krahët e tjerë. U duk si një reflektim në heshtje edhe nga partitë e tjera opozitare, përveç asaj minoritare, por keni thënë që nuk do ketë zgjedhje. Ka shkuar prefekt z. Tavo, me marrëdhënie të shkëlqyera me Athinën, a është ky fillimi i zgjidhjes së situatës në Himarë.

Rama: Problemi në vetvete, që lidhet me një emër të veçantë është një problem i drejtësisë dhe atë problem do e adresojë deri në fund vetëm drejtësia. Në këtë pikë, pozicioni ynë nuk ndyshon dhe në këtë pikë nuk ka asgjë, asgjë, asnjë lloj qasje politike, asnjë lloj presioni.

Megjithëse vendimi që ju keni marrë është disi i diskutueshëm nga pikëpamja ligjore, që thoni nuk do ketë zgjedhje..

Rama: Jo, ta shpjegoj. Në këtë aspekt nuk ka çfarë ndryshon asgjë dhe ne jemi aty ku kemi qenë që në sekondën e parë, dhe na vjen keq shumë që nga ana e fqinjëve dhe e miqve tanë grekë kjo nuk është kuptuar si duhet, apo nuk është vlerësuar sa duhet, është menduar që me presion mund të lëvizim nga ky pozicion sepse kjo nuk ka për të ndodhur. Ndërkohë ne marrëdhëniet dhe komunikimet i kemi të vazhdueshme dhe as bëhet fjalë që të djegim organin për një plesht, nuk bëhet fjalë. Ne kemi vetëm pozitivitet dhe vetëm dëshirë pozitive që marrëdhëniet me Greqinë të ngjiten nivelin më të lartë të mundshëm të parneritetit, të miqësisë, të fqinjësisë e kështu me radhë.

Politike

‘Goditja’ e Metës/ Kokalari: Kryemadhin po e heqin nga Partia e Lirisë me…

Evi Kokalari nëpërmjet një postimi në rrjetet sociale paralajmëron se Monika Kryemadhi po hiqet nga Partia e Lirisë.

Sipas saj ajo po hiqet nga partia me të njëjëtat metoda si Partia e Punësh së Shqipërisë në periudhën komuniste që i shpallte luftë armiqve të brendshëm.

Për të mbështetur aludimin e saj, Kokalari përdor një citim të shkëputur nga fjala e Kryetarit të PL-së Ilir Meta në mbledhjen e Kryesinë së Partisë së Lirisë!

“Monika Kryemadhin po e heqin nga Partia me të njëjtat metodat si të PPSH ndaj armiqve të brendshëm”-shkruan në postimin e saj Kokalari.