KRIZA PËRSHKALLËZOHET/ Italia përgatit misionin detar në Detin e Kuq

Italia po përgatitet të forcojë praninë e saj detare në Detin e Kuq, me synim garantimin e kalimit të anijeve tregtare në ngushticën Bab el-Mandeb, ndërsa tensionet në rajon kanë rritur shqetësimet për sigurinë e një prej korridoreve të rëndësishme të transportit detar.

Ministri italian i Mbrojtjes, Guido Crosetto, ka kërkuar shtimin e mjeteve detare në zonë dhe ka deklaruar se Roma nuk dëshiron të presë për një reagim më të gjerë europian. Italia është pjesë e misionit të BE-së, Aspides, i nisur në vitin 2024 për mbrojtjen e lundrimit tregtar në Detin e Kuq.

Një ditë më parë, Crosetto njoftoi se Italia po përgatit një plan për të garantuar kalimin e sigurt të anijeve italiane përmes Bab el-Mandeb, duke argumentuar se vonesat në vendimmarrje mund të kenë pasoja ekonomike. Ai tha se çdo vendim për angazhimin e anijeve do të merret në koordinim me qeverinë dhe Parlamentin.

Ndërkohë, Roma ka kërkuar edhe forcimin e misionit Aspides. Sipas ANSA-s, Italia është e gatshme të dërgojë një fregatë të dytë nëse kërkohet, ndërsa ministri Crosetto i ka kërkuar vendeve të tjera europiane të kontribuojnë me mjete dhe financim.

Tensionet janë shtuar pas avancimit të forcave Houthi të mbështetura nga Irani në zonat bregdetare të Jemenit pranë Bab el-Mandeb. Në të njëjtën kohë, trafiku detar në Ngushticën e Hormuzit është prekur nga konflikti SHBA-Iran, duke rritur shqetësimet për rrugët alternative të transportit të energjisë dhe mallrave.

Për Italinë, çështja ka edhe rëndësi të drejtpërdrejtë ekonomike. Sipas të dhënave të cituara nga Reuters, rreth 40% e tregtisë italiane me pjesën tjetër të botës kalon përmes Kanalit të Suezit. Çrregullimet në këtë korridor mund të sjellin rrugë më të gjata transporti, kosto më të larta dhe vonesa në furnizime.

Ndërkohë, marina italiane ka vijuar angazhimin në kuadër të Aspides. Më 18 shtator, fregata italiane “Carlo Bergamini” shoqëroi anijen tregtare “Jolly Oro” gjatë kalimit në Bab el-Mandeb, në një operacion që sipas autoriteteve italiane synon mbrojtjen e trafikut tregtar.

Roma po kërkon kështu njëkohësisht forcimin e misionit europian dhe përgatitjen e masave kombëtare për mbrojtjen e anijeve italiane, ndërsa zhvillimet në Detin e Kuq dhe Bab el-Mandeb mbeten të lidhura ngushtë me sigurinë e tregtisë ndërkombëtare.