“Kush flirton me korrupsionin, kush tradhton qytetarët e anëtarët e PS, nuk është as ne dhe as i yni”, ishte ky mesazhi i prerë i kryeministrit Edi Rama përpara ministrave dhe deputetëve të grupit parlamentar.

“Kushdo që tradhton ata që na kanë besuar, kush flirton me armikun korrupsion, kush i tradhton njerëzit e zakonshëm që na kanë dhënë privilegjin të udhëheqim, nuk është as ne as i yni dhe as nuk ka as një punë me ne. Kushdo  që fut duart në arkën e këtij shteti nuk është ne nuk ka si të jetë në e si të kërkojë gjë tjetër nga ne përveç përbuzjes, e thënë ndryshe çdo anëtar i kësaj familje të madhe politike që bën korrupsion është një tradhtar.

Kur qëllon që një hajdut dhe parazit i tillë zbulohet nga drejtësia i hidhur është fakti që e kishim mes nesh por fakti se kemi një parazit më pak mes nesh është lajm i mirë.”

Kryeministri Edi Rama e ka nisur fjalën e tij në mbledhjen e Grupit të PS dhe kabinetit qeveritar duke thumbuar rivalët e tij politik, Sali Berishën dhe Ilir Metën.

Rama u shpreh se në vitin 2013 morën Shqipërinë e rrënuar, siç tha ai nga ata që ‘klithin ditë e natë apo bërtasin të shfrenuar foltoreve dhe penxhereve të televizorëve’.

Kreu i PS, njëherësh edhe kryeministri i vendit, u shpreh se po bëhet një përpjekje ekstreme për të helmuar publikun dhe për të krijuar një ‘hendek mes nesh dhe shumicës së shqiptarëve që na kanë votuar’.

Kryetari i Bashkisë së Tiranës, Erion Veliaj i ka quajtur qesharake përpjekjet e opozitës për të krijuar një situatë përplasjeje mes tij dhe Kryeministrit Rama, kësaj here duke stisur edhe retushimin e një fotografie.

Veliaj e siguroi opozitën se do t’u bëhen gjunjët me kallo nga lutjet që mes tij dhe kryeministrit të kenë një konflikt.

“Ajo është thellësisht qesharake sepse transmetimi i ceremonisë së nderimit të Ali Ahmetit ishte live. Para se të largohej, familja e z. Ahmeti donte një foto me kryeministrin. Duket live kur në atë moment po bëja edhe koreografin e fotografisë. E bija e z. Ahmeti më thotë na u bashko për një foto të fundit. Nga 10 fotografë që ishin aty janë shkrepur disa qindra foto. As unë, Edi Rama jo e jo, nuk kemi komplekse të tilla. Nuk bëjmë as kështu lojërash. Ju kam thënë gjithmonë: Unë i kam shërbyer PS, kam punuar me Edi Ramën edhe kur s’kam pasur asnjë spaletë, asnjë titull, nga 2009-2013, edhe pse humba për një grusht votash në Berat, sepse njerëzit që e kanë vokacion, i shërbejnë atij misioni pa qenë të interesuar nëse kanë ofiqe dhe karrige. Opozitës i kam thënë: do t’i bëhen gjunjët me kallo dhe do luten deri në pafundësi të jetës që unë dhe Edi Rama të kemi konflikt dhe prej këtij konflikti të rikthehet Saliu me Ilirin. Kjo s’ka për të ndodhur kurrë”, tha ai.

Veliaj u shpreh se në fakt Sali Berisha dhe Ilir Meta ishin ata që urdhëruan bllokimin e dhënies së titullit “Qytetar Nderi” për një personalitet si Ali Ahmeti.

Avokati i njohur, Spartak Ngjela ka komentuar situatën poltike në vend. Gjatë një intervistë për gazetën “SOT”, avokat Ngjela është ndalur tek drejtësisë së re, teksa theksoi se SPAK është i vendosur për t’ju shkuar deri në fund luftës kundër korrupsionit.

Nga ana tjetër, Ngjela zbuloi se para se të ikte nga Shqipëria, ambasadorja amerikane, Yuri Kim i ka thënë gjatë një bisede, se prokurorët e SPAK janë të trembur dhe se kishte kërkuar që t’i mbronin.

-Avokat Ngjela, thuhet këto ditë që do të presim ngjarje tronditëse, ngjarje të mëdha, arrestime të bujshme, emra shumë të rëndësishëm të politikës shqiptare për të cilët do të kërkohet nga SPAK masa sigurie, ziejnë studiot televizive nga këto lajme por diçka konkrete nuk ka?

Konkrete ka, se është arrestuar Saliu.

Arrest quhet ai, gjysmë dite e fiton këtu e gjysmë dite e fiton në burg. Njësoj, regjim është edhe ai. Problemi qëndron se a do të dënohet apo jo. Ndërkohë kjo tregon se drejtësia ka provat që ato nuk mund t’i shmangen. Si do ecë çështja e tyre, varet kur të shohim provat. Në ato prova që ne kemi parë për Saliun dhe dhëndrin e tij në lidhje me çështjen e ish-kompleksit ‘Partizani’, ka indicie brenda. Por për faktin që po zgjatet kaq shumë hetimi, provat nuk janë të konsoliduara, d.m.th janë në favor të akuzuarve. Profesionalisht, për vepra penale që janë gati në flagrancë, hetuesia po zgjatet janë dy arsye:

2. Ose po kërkojnë për vepra të reja penale që mund të jenë kryer.

Nga ana tjetër, janë dhe tre ministra, një zv. Kryeministër nën akuzë, është thirrur në SPAK një kryebashkiak i lartë që nuk dimë a ka dhënë dëshmi a jo dhe pse ka dijeni për ngjarjen (5 D).

-Prej ditësh Ilir Meta ka përdorur një gjuhë të ashpër e të vrazhdë ndaj kreut të SPAK, tensionet nuk kanë munguar, ka reaguar edhe Këshilli i Lartë i Prokurorisë edhe ambasadat e huaja në Tiranë, por është thënë që janë drejt përfundimit hetimet por nuk kemi parë asgjë konkrete ndaj zotit Meta dhe zonjës Kryemadhi. Është një strategji e SPAK-ut kjo?

Hetimi zgjat, e aq më tepër për një ish-president e ish-kryeministër që ka mbajtur këto poste ai. SPAK-un nuk e drejtojnë shqiptarët, e drejton ekspertiza Amerikane, e di Meta, por është i trembur, nuk godet SPAK-un por Uashingtonin. Në gjuhën e tij është nivel i ulët i koshiencës, nuk është Meta ai. Meta nuk ka aftësi intelekti dhe nuk e kupton se çfarë po ndodh, godet SPAK-un që të trembet Amerika. Nuk goditet SPAK-u, por merr masa me avokat të mëdhenj që të marrësh pafajësinë. Këto lloj ekuacionet janë të barabartë me 0.

-Sekretari i Përgjithshëm i Partisë së Lirisë, ka thënë që zoti Meta ka ngritur tonet dhe ka përdorur atë gjuhë ndaj SPAK-ut sepse deri tani SPAK nuk ka reaguar ndaj denoncimeve që ka bërë opozita?

Organet e drejtësisë nuk preken në një vend demokratik. Këto janë shollogunët që kanë ardhur nga komunizmi, ku dinë këto se çfarë është demokracia, shollë dhe gunë, nuk dinë asgjë, erdhën dhe vodhën këtë vend.

-Mund të ngarkohen me përgjegjësi penale zoti Meta dhe zonja Kryemadhi?

Krimi është qëndrimi psikik ndaj veprës. Është qëndrimi psikik i personit ndaj veprës penale. Ky qëndrim psikik i këtij personi jep derivatin nëse është i fajshëm ose jo. Se mund të ketë ndodh një krim nën petkun tënd por ti nuk je në dijeni dhe nuk ke qëndrim psikik, nuk ke dashje.

-Si i keni parë lëvizjet e Partisë së Lirisë, ku ka qenë në një krizë e si e tillë u finalizua me Konventën ku u zgjodh President Ilir Meta dhe largoi Monika Kryemadhin si anëtare kryesie?

Kjo quhet sorollatja nëpër kallamishte, mirëpo mendje lehtësia e një injoranti futet në kallamishte se mendon se do fshehet, por një helikopter e sheh nga lart. Nuk kanë asnjë mbrojtje, e i kanë bërë hapur krimet. Njeriu që akuzohet për t’u mbrojtur duhet të tregojë akuzën në publik. Lëvizjet e tjera janë gjurulldi për të krijuar tensione .

-Këtë që po ndodh po e konsideroni një teatër?

Ka një tension ku ka qëllimin dhe duan të krijojnë destabilizim, por me 30 veta nuk krijojnë destabilizim pasi nuk i erdhi njeri në Konventë. Ilir Meta është në delir, janë dy aksioma për të akuzuarin, o shkon në delir e i duket vetja mbret, o shkon në manipersekucioni, prandaj domosdoshmërisht duhet të ketë avokat.

-Si e parashikoni të ardhmen politike të zotit Meta?

Nuk mund të ketë të ardhme politike, Ilir Meta pasi nuk ka vota. Në gjithë këto lëvizje që ka bërë tregon se ka humbur përqindje votash.

-Vetë SPAK-u ka momente stepje herë pas here?

Ka. Ambasadorja Kim, 4 muaj para se të ikte më tha që Prokurorët e SPAK janë të trembur. Iu thash vendosuni mbrojtje, por kanë fëmijë e krimi të godet aty ku nuk e mendon kurrë.

-Zoti Dumani deklaroi publikisht se një nga Prokurorët e SPAK ishte kërcënuar te familja e tij…

Fakti që e deklaroi se është i kërcënuar do të thotë se e ka deklaruar i kërcënuari, prokurori. Fakti që nuk e ka deklaruar do të thotë se nuk ka pranuar shantazhin, është në favor të shoqërisë shqiptare. Kur i shantazhuari nuk e deklaron shantazhin, kuptohet që është thyer, kur i kërcënuari publikon shantazhin do të thotë që nuk ka pranuar.

-Keni informacione që Prokurorë të caktuar janë kërcënuar seriozisht nga politika dhe bota e krimit të organizuar?

Politika po kërcënon është në krim, politika që kërcënon drejtësinë është në botën e krimit, e kërcënon me kosharat që ka jo vetë personalisht.

-Cilat janë këto ngjarje që pritet të ndodhin, pasi diskutohet shumë kohët e fundit?

Kur drejtësia e sidomos hetimi e nxjerr këtë se do të ketë ngjarje e flitet për personalitete të mëdhenj, ajo është ngjarja që mbahet sekret. Unë them se as Rama nuk është i sigurtë në luftën anti-korrupsion. Do ketë zbutje për faktin se ka ndihmuar në funksion të ligjit por drejtësia është drejtësi. Po të kesh futur dorën te ëmbëlsira e shtetit, nuk shpëton dot. Jo vetëm Rama por të gjithë kryeministrat nuk shpëtojnë dot, nuk janë të sigurtë.

-Ngjarjet do të jenë të fokusuara vetëm në Shqipëri dhe i referohem deklaratave të huajve që jetojnë në Shqipëri dhe që kanë një lloj influence…

Këto i ndihmon FBI-ja dhe organizmat ndërkombëtare të hetimit të cilat i kanë investiguar dhe iu kanë konstatuar e perceptuar shumat e parave që i kanë depozituar. Nuk i di emrat, por një nga këto ekspertë më tha se tre pushtetarë të nivelit të lartë nga 1 miliardë dollarë në perëndim.

Nuk ka rëndësi në e ka vënë pasurinë në emrin e gruas apo në emrin e motrës së gruas. Këto nuk e kuptojnë se i madh është i fshehur informacioni politik sot në perëndim e sidomos në SHBA gjithçka dinë. P.sh, nëse unë sot i them një mikut tim që punon në këto organe e dëgjoje avokatin duke i dhënë pozicionet gjeografike, menjëherë ato që flet të dëgjon, pa qenë nevoja të kenë aparate përgjimi pasi funksionon me satelit. Dëgjojnë gjithçka dhe e kanë sekret pasi vetëm ato i kanë.

“Partia Socialiste është sot një parti që në mënyrë konstante është në beteja, në përpjekje për të vijuar të transformojë Shqipërinë, dhe unë besoj që PS sot është padyshim forca më patriotike dhe më progresiste që ka patur ndonjëherë vendi”, kështu është shprehur kreu i Bashkisë së Tiranës Erion Veliaj, në një intervistë në emisionin “Real Story” në ABC News.

Gjithashtu Veliaj nënvizoi se në asnjë moment tjetër Shqipëria nuk është qeverisur nga një forcë më e mirë, se Partia Socialiste.

Pjesë nga intervista:

Pyetje: Erion, ti përmende pak më herët banaqet e Tiranës, ato që Rama i quan kazani mediatik, në një nga këto dëgjova me këmbëngulje që thoshte Erion Veliaj do shkarkohet nga drejtues politik i qarkut të Tiranës dhe nuk e di nëse kjo do ndodhë apo jo, por nëse kjo ndodh çfarë do të thotë për Erion Velinë.

Erion Veliaj: Unë kam punuar si aktivist edhe si njeri që bën fushata në PS pa patur asnjë ofiq, kështu qe do ta bëj këtë gjithmonë, me ofiq ose pa ofiq, me Bashki ose pa bashki, me titull ose pa titull. Sepse unë besoj që njerëzit që i trajtojnë betejat e tyre si pjesë një misioni janë ata që i fitojnë betejat dhe e çojnë misionin deri në fund. Njerëzit që pastaj, në varësi të ofiqit që kanë, dhe të kujtoj që në 2009 pata një super disfatë, për një grusht votash humba mandatin ne Berat, dhe nëse vure re nga 2009 deri në 2013 përfshi edhe 21 janarin, angazhimet e tjera, punën me diasporën, e bëra pa patur asnjë ofiq. Kjo do të thotë që në botë janë ndarë njerëzit, që e ndjejnë që kanë një vokacion dhe kanë një mision dhe njerëz që pastaj mendojnë që vetëm kur të kem ofiqin dhe spaletat do shkrep pushkën.

Pyetje: Më kujtove një shembull të bukur të 2009, në sondazhet që unë drejtoja atëherë G99 ishte shumë lart, shumë më lart se LSI, dhe befas G99 u kthye në një kamikaze përballë LSI, e di që nuk keni për ta pranuar kurrë, por unë e di shumë mirë që në atë rrugë, shkuat për shkak të një rakordimi që kishit me kreun e PS, z.Rama dhe jam i sigurt që u vetësakrifikuat me ndërgjegje për një gjë të tillë, në emër të një kauze të fitores së PS vetëm, pra pa ndihmat e patericave të LSI, mendoni se z. Rama mund t’iu sakrifikojë edhe ju, por kësaj radhe pa dijeninë tuaj?

Erion Veliaj: Kjo është një pyetje që nuk është për mua dhe s’është me vend se nuk besoj se edhe analogjia që ju përmendët e 2009 ishte një sakrifikim. Ishte një kalkulim i sondazheve të asaj kohe ku ne besonim se kishte qoftë edhe për ato pak vota, një dritare shumë të mirë për një forcë të re. Sigurisht duke mos patur komisionerë, prezencën kapilare. Vendimi më racional ishte të bashkonim forcat me atë që është partia më e madhe në vend, më progresiste në vend. Atë parti që Edi Rama e transformoi me dyer të hapura, por fillimisht me një mendje të hapur, si një hapësirë për të gjithë të rinjtë që donin të jepnin një kontribut, dhe ma dha këtë shans mua, ia dha këtë shans shumë të tjerëve. Është sot një parti që në mënyrë konstante është në beteja, në përpjekje për të vijuar të transformojë Shqipërinë, dhe unë besoj që PS sot është padyshim forca më patriotike dhe më progresiste që ka patur ndonjëherë vendi. Në 100 e ca vite shtet nuk gjykoj që ka patur një moment që Shqipëria të jetë qeverisur nga një kryeministër, apo një forcë më e mirë, me gjithë imperfeksionet tona. Shiko, njeriu edhe në familje ka gjëra që duhen sqaruar edhe prodhohen pafund debate, imagjinoje një familje me 1 milion veta dhe me një kuzhinë me 1 mijë tiganë, ku ka 1 mijë kantiere që ziejnë kudo. Sigurisht që ka gjithmonë vend për të bërë disa gjëra më mirë. Kemi patur një transformim total në Bashki edhe me ndryshimin e nënkryetarëve edhe me ndryshimin e drejtorive, është një familje e madhe me 12 mijë veta, rreth 11 700 në mos gaboj, kështu që në këtë sens është pjesë  e një ristrukturimi të jashtëzakonshëm, por unë gjykoj që për sa kohë që qyteti mban ritmin e punëve, njerëzit secili që ka bërë punë do vlerësohet, secili që duhet të bëjë sqarime duhet të bëjë sqarime, por që karvani do shkojë përpara kjo s’ka asnjë dyshim.