Shishe qelqi në kokë dhe shqelma ndaj Chris Brown/ Sulmi në një klub nate në Londër

Ai do të dënohet në muajin tetor, ndërsa akuzat më të rënda për sulm, tentativë për shkaktim të lëndimeve të rënda trupore dhe posedim të një arme sulmuese janë rrëzuar.

Sipas Policisë Metropolitane, kamerat e sigurisë tregojnë se Brown goditi disa herë viktimën në kokë me një shishe qelqi. Më pas, viktima u ndoq, u rrëzua në tokë dhe u godit me shqelma. Nga sulmi, producenti muzikor Abe Diaw pësoi lëndime në kokë dhe gju, duke pasur nevojë për trajtim spitalor.

Bashkë me Brown, fajësinë për përleshje e pranoi edhe Omololu Akinlolu, i njohur me emrin artistik Hoody Baby. Edhe ndaj tij u hodhën poshtë akuzat për sulm dhe tentativë për shkaktim të lëndimeve të rënda trupore.

Ngjarja ndodhi në orët e para të 19 shkurtit 2023 në klubin privat Tape, në zonën Mayfair të Londrës. Prokurorët thanë se Brown iu afrua viktimës nga pista e vallëzimit dhe e goditi me një shishe qelqi, ndërsa Akinlolu iu bashkua sulmit. Sipas Shërbimit të Prokurorisë së Kurorës, të dy vazhduan ta godisnin viktimën edhe kur ai u përpoq të largohej dhe e shqelmonin ndërsa ndodhej i pambrojtur në dysheme.

Detektivja Zara Ripamonti e Policisë Metropolitane e cilësoi sulmin si “të turpshëm dhe të paprovokuar”, duke theksuar se nuk ka vend për dhunë të tillë në Londër. Ndërsa prokurorja Claire Campbell deklaroi se përdorimi i një shisheje qelqi si armë në një klub të mbushur me njerëz ishte një akt i rëndë dhune dhe se askush nuk është mbi ligjin.

Brown dhe Akinlolu u paraqitën në Gjykatën e Kurorës në Southwark, ku seanca zgjati më pak se pesë minuta. Gjykatësi Tony Baumgartner caktoi seancën e shpalljes së dënimit për 26 tetor dhe lejoi Brown të largohet nga Mbretëria e Bashkuar me kusht që të kthehet një ditë më parë për vendimin e gjykatës.