Stuhia arktike në SHBA

SHBA– Stuhia e Arktikut që goditi verilindjen e Shteteve të Bashkuara vazhdon të krijojë viktima, numri i të cilëve ka shkuar deri në 59.

Rreth 37 vdekje kanë ndodhur në zonën Buffalo në shtetin e Nju Jorkut, epiqendra e krizës për të cilën presidenti i Shteteve të Bashkuara, Joe Biden, ka miratuar një gjendje të jashtëzakonshme. Deklarata e nënshkruar nga presidenti lëshon fondet federale dhe mobilizon Agjencinë Federale të Menaxhimit të Emergjencave (FEMA).

Shumë vdiqën nga ngrirja në shtëpi ose në makinë: Qarku Erie i Nju Jorkut, ka 37 nga 59 vdekjet e shkaktuara nga stuhitë, sipas një raporti të ri nga AFP. Sipas autoriteteve, njerëzit vdiqën sepse nuk kishin ngrohje në shtëpi ndërsa të tjerë janë gjetur të vdekur në makinat e tyre ose në rrugë.

Në Buffalo, të vdekurit kontrollohen shtëpi më shtëpi: Garda Kombëtare ka shkuar derë më derë në pjesë të Buffalo, Shtetit të Nju Jorkut për të vëzhguar jetën e njerëzve të mbetur pa energji gjatë stuhisë më të fortë dimërore të zonës në dekada.

Ky mot jashtëzakonisht i ftohtë në shumë pjesë të Shteteve të Bashkuara dhe Kanadasë është i ashpër për njerëzit, dhe gjithashtu për kafshët e egra. SHBA-të tani po dalin ngadalë nga stuhia historike, por ndikimi i saj vazhdon të ndihet në Buffalo dhe në aeroporte, me qindra mijëra pasagjerë që u anulohen fluturimet.

Pjesa e ngrirë e Ujëvarës së Niagarës: Një pjesë e Ujëvarës së Niagarës ngriu për shkak të stuhisë së Arktikut. The New York Post raporton duke nënvizuar se fenomeni ka ndodhur vetëm pesë herë në histori. Për shkak të vëllimit të madh të ujit të derdhur, 3160 tonë në sekondë, ujëvarat më të famshme në botë nuk mund të ngrijnë kurrë plotësisht.

Polemika për kryebashkiakun e Nju Jorkut me pushime gjatë emergjencës: Kryetari i bashkisë së Nju Jorkut, Eric Adams, i është dashur të mbrohet nga kritikat për mungesën e tij gjatë stuhisë së Arktikut që goditi qytetin.

“Pas 365 ditësh angazhim, vendosa të marr dy ditë për të reflektuar për nënën time”, e cila u nda nga jeta dy vite më parë, shpjegon Adams. “Duke parë reagimin për dy ditët e mia jashtë qytetit më alarmon. Gjithashtu meritoj një jetë të ekuilibruar në punë dhe private. I meritova dy ditët e pushimit,” ka thënë Adams.