Hakerat rusë shënjestruan shkencëtarët bërthamorë amerikanë

SHBA-Një investigim i publikuar nga agjencia ndërkombëtare e lajmeve Reuters zbulon se një grup hakerash rusë ka shënjestruar laboratorët e kërkimit bërthamor në SHBA. Grupi i njohur si Cold River shënjestroi tre laboratorë kërkimor bërthamor në Shtetet e Bashkuara përgjatë verës së vitit 2022. Gjetjet janë zbuluar nga Reuters dhe 5 ekspertë të sigurisë kibernetike.

Midis gushtit dhe shtatorit, kohë kur presidenti Vladimir Putin deklaroi se Rusia do të ishte e gatshme të përdorte armë bërthamore për të mbrojtur territorin e saj, Cold River shënjestroi Laboratorët Kombëtarë Brookhaven (BNL), Argonne (ANL) dhe Laërence Livermore (LLNL). Ata mundën të krijonin faqe të rreme hyrjeje për çdo institucion dhe u dërgonin email shkencëtarëve bërthamorë në një përpjekje për t’i bërë ata të zbulonin fjalëkalimet e tyre. Reuters nuk ishte në gjendje të përcaktonte pse laboratorët ishin në shënjestër ose nëse ndonjë përpjekje për ndërhyrje ishte e suksesshme. Një zëdhënës i BNL nuk pranoi të komentojë. LLNL nuk iu përgjigj një kërkese për koment. Një zëdhënës i ANL i referoi pyetje Departamentit të Energjisë të SHBA, i cili nuk pranoi të komentojë.

Cold River ka përshkallëzuar fushatën e saj të hakerëve kundër aleatëve të Kievit që nga pushtimi i Ukrainës, sipas studiuesve të sigurisë kibernetike dhe zyrtarëve të qeverisë perëndimore. Sulmi dixhital kundër laboratorëve amerikanë ndodhi kur ekspertët e OKB-së hynë në territorin ukrainas të kontrolluar nga Rusia për të inspektuar termocentralin më të madh atomik të Evropës dhe për të vlerësuar rrezikun e asaj që të dyja palët thanë se mund të ishte një katastrofë shkatërruese rrezatimi mes bombardimeve të rënda aty pranë.

Cold River u shfaq për herë të parë në radarin e profesionistëve të inteligjencës pasi kishte shënjestruar zyrën e jashtme të Britanisë në vitin 2016, si dhe është përfshirë në dhjetëra incidente të tjera të profilit të lartë hakerimi në vitet e fundit, sipas intervistave me nëntë firma të sigurisë kibernetike.

“Ky është një nga grupet më të rëndësishme të hakerëve për të cilët nuk keni dëgjuar kurrë,” tha Adam Meyers, nënkryetar i lartë i inteligjencës në firmën amerikane të sigurisë kibernetike CrowdStrike. “Ata janë të përfshirë në mbështetjen e drejtpërdrejtë të operacioneve të informacionit të Kremlinit.”