Ish-deputeti i PD: Eshtë tragji-komedi të përfundosh në duart e Gaz Bardhit

Ish- deputeti Aleksandër Biberaj ka komentuar situatën ku ndodhet aktualisht Partia Demokratike për të cilën u shpreh se PD është përçarë në 500 copash dhe askush nuk po merr iniciativën për ta bashkuar. Ai tha se nga viti ‘90 deri sot në PD nuk ka pasur rrotacion dhe kjo ka vrarë shpresën besimin. Sipas tij, komisionet hetimore janë një e drejtë kushtetuese dhe Rama po e ndryshon se nuk do prani të opozitës. “Padiskutim PD është pasqyrë kombëtare dhe shqetësimi është i saktë dhe sa herë flasim keq e më keq shkon puna sepse drejtuesit nuk dëgjojnë. Kolegët e mi nuk janë as në tokë dhe as në qiell, PD është përçarë është bërë 500 copash dhe askush nuk po merr iniciativën për ta bashkuar. A do vazhdojmë të rrimë akoma me këtë qeveri apo do bëhemi bashkë për të bërë rrotacion, por PD s’ka rrotacion as brenda llojit të saj. Nga ‘90 deri sot s’ka rrotacion në PD, se dhe Basha ishte një artificë artificiale.  Është vrarë shpresa, besimi, arsimi ka degraduar, kujdesi shëndetësor, pagat pensionet nuk rriten fare, pra të gjitha shtresat e shoqërisë janë në gjendje të mjerueshme dhe kjo është vajtuese. Të gjithë po ikin ndërsa kolegët e mi vazhdojnë me punët e tyre kur dihet se PD ka resurse, por duhet të shkëputesh nga interesat personale dhe duhet të diskutosh për kauza.  Duhet ti ndajmë gjërat, aksioni opozitar në parlament, se ato që po bën Rama në parlament nuk i bën asnjë lloj maxhorance. Komisionet hetimore janë një e drejtë kushtetuese dhe Rama po e ndryshon se nuk do prani të opozitës”, tha ai. Më tej ai shtoi se problemi që ka Berisha me drejtësinë është problem tjetër dhe sipas tij ato nuk duhet që të bashkohen sepse ky bashkim e bën kauzën e opozitës të pabesueshme.

“Ideja është se duhet ti ndash, por nëse kthehemi në zgjedhjet lokale Berisha duhet të kishte dhënë dorëheqjen dhe të ishte larguar sepse nuk kemi kohë, duhet të ishte larguar pa filluar këto probleme të gjyqësorit nëse dëshiron të shohë një PD të bashkuar dhe që vjen në pushtet. E ka humbur besimin se protesta ishte e vakët, e ka humbur besimin sepse s’ka më shpresë dhe besim”, tha Biberaj.

I pyetur si e sheh pozicionin e Gazmend Bardhit, Biberaj tha se ai nuk mund të jetë e ardhmja e PD pasi nuk ka dhënë asgjë politikisht.

“Si mund të jetë Gazmend Bardhi e ardhmja e PD, është tragjedi komedi të përfundosh në duart e tij. Basha dhe Bardhi janë i njëjti sistem. Ka intelektualë pa fund PD, por jo detyrimisht duhet të jetë i konsumuar. Bardhi nuk ka dhënë ndonjë gjë politikisht. Problemi këtu është se nuk ka garë, nga 2013 është vrarë gara. PD sot është pothuajse e tharë dhe do vazhdojë të thahet dhe më shumë sepse modeli i zgjedhjes së liderit nga Berisha do dështojë.

Partitë nuk janë feude që t’ja lësh trashëgimi djalit, vajzës, nipit apo mbesës, monarkitë trashëgohen, jo partitë në demokraci. Berisha në përzgjedhjen e bashkëpunëtorëve ka dështuar në mënyrë spektakolare dhe ai më i madhi që i kushtoi kombit ishte prej mentaliteteve që ai thotë do orientoj. Ka kohë që kërkoj garë se vetëm ajo nxjerr kandidatin më të mirë dhe fitues.

Gara mund të bashkojë një popull opozitar dhe sjell rotacion në 2025. Maxhoranca ka 100% të pushteteve, kjo dhe për faj të opozitës. Unë e di si funksionon qeverisja, Rama di çdo gjë që ndodh, ministrat që ai ka si kukulla dhe frymë kur marrin kërkojnë leje. Asgjë nuk bëhet në vend pa dijeninë e kryeministrit. E dinë të gjithë se ky kryeministër është kryehajduti i një populli të varfër. Revolucionin nuk e bëjnë 40 deputetë por një popull i tërë”, tha ai.