Dumani në Shkup/ Merr pjesë në konferencën me drejtues të lartë të drejtësisë në vendet e rajonit

Kreu i Prokurorisë së Posaçme, Altin Dumani ndodhet sot në Shkup të Maqedonisë së Veriut, së bashku me disa prokurorë të SPAK.

Sipas njoftimit zyrtar, në këtë aktivitet ku shkuan Dumani dhe prokurorët morën pjesë drejtues të lartë të drejtësisë së Maqedonisë, Kosovës dhe Malit të Zi.

Të pranishëm në këtë konferencë ishin dhe përfaqësues të Ambasadës së Mbretërisë së Bashkuar, në Maqedoninë e Veriut. Në fokus të diskutimeve, bashkëpunimi për një qasje më të koordinuar në luftën kundër krimit të organizuar.

NJOFTIMI I SPAK:

Drejtuesi i Prokurorisë së Posaçme, Zoti Altin Dumani, së bashku me prokurorë të Prokurorisë së Posaçme, është ftuar ditën e sotme në Konferencën Rajonale të Prokurorive Përgjegjëse për Luftën kundër Krimit të Organizuar në Shkup, Maqedoninë e Veriut. Në këtë aktivitet të rëndësishëm, marrin pjesë Drejtues të Lartë të Prokurorisë Themelore Publike për Ndjekjen e Krimit të Organizuar dhe Korrupsionit të Maqedonisë së Veriut, Prokurorisë Speciale të Republikës së Kosovës dhe Prokurorisë Speciale të Malit të Zi.

Gjithashtu të pranishëm në këtë Konferencë janë dhe përfaqësues të Ambasadës së Mbretërisë së Bashkuar, në Maqedoninë e Veriut. Rëndësia e kësaj Konference qëndron në faktin se, drejtuesit më të lartë të zyrave të prokurorive të caktuara për luftën kundër korrupsionit, do të diskutojnë rreth forcimit të bashkëpunimit dhe lehtësimit të shkëmbimit të eksperiencave më të mira, për të pasur një qasje sa më të koordinuar në nivel rajonal në luftën kundër krimit të organizuar dhe korrupsionit.

Një vëmendje e veçantë do t’i kushtohet rritjes së bashkëpunimit në luftën kundër pastrimit të parave, duke marrë parasysh diversifikimin e mënyrave të pastrimit të parave nga krimi i organizuar dhe shpërndarjen e investimeve të tyre në disa vende të rajonit. Drejtuesi i Prokurorisë së Posaçme, Zoti Altin Dumani, bëri një prezantim të qasjes shteruese të SPAK, ndaj hetimit të krimit të organizuar, dhe gjithashtu trajtoi praktikën e ndjekur tashmë nga ky institucion, në lidhje me fillimin paralel të hetimit pasuror dhe/ose financiar, për çdo hetim që lidhet me krimin e organizuar dhe korrupsionin.