‘Nëse PD nuk largon Berishën, do shkrihet pas zgjedhjeve, gjermanët folën qartë, por a do i dëgjojnë…’

Kreshnik Spahiu komentoi protestën e opozitës më 7 tetor.

Spahiu mori në shqyrtim edhe deklaratat e forta të përfaqësuesit të CDU-së gjermane në PPE, Krichbaum, që u shpreh se Berisha me akuzat që ka duhej të ishte në burg.

Sipas Spahiut, mesazhi është i qartë, se PD rrezikon shkrirjen pas zgjedhjeve të 2025 nëse në krye mbetet ende Sali Berisha.

“PD i ka mbetur ura e fundit. Ka shkatërruar urat me SHBA dhe Britaninë. Ura e fundit është anëtarësimi në PPE. Ende konsiderojnë një shpres që kjo parti të mbijetojë pa Sali Berishën.

Mesazhi i CDU ishte i qartë: Largoni Sali Berisha përndryshe kjo parti shkon në shpërbërje. I njëjtë me Yuri Kim, që tha largoni liderin e vjetër.

Lideri i CDU shkoi më tej, se duhej të ishte në burg. Këto parti popullore, ndoshta nuk do ndërhyjnë para zgjedhjeve, ashtu si SHBA shpallën statusin non grata dy javë pas zgjedhjeve. Pas zgjedhjeve do të vënë në konsiderat përjashtimin e saj nga anëtarësimi europian”, tha Spahiu për Report TV.

Më tej Spahiu krahasoi veprimet gjatë protestës së PD-së me ato veprime të ultrasve të futbollit pas një ndeshjeje derbi, si p.sh ultrasit e Tiranës apo Partizanit.

“Në fakt ajo ishte protesta më e vogël, më e dobët, më e paorganizuar, më e dështuara në historinë e protestave të demokratëve. Ajo i përngjan reagimit pas ndeshjeve të grupimeve të ultrasve të Partizanit apo Tiranës.

Që djegin pemë, thyejnë xhama apo godasin me fishekzjarrë. Nuk ka fare lidhje me konceptin politik të mosbindjes civile. Do të thotë të mos njohësh institucionet. Ka ndodhur në vitin 1991, gjithë Shqipëria u fut në grevë. Ka ndodhur dhe në 97 ku e rrëzuan me dhunë pushtetin”, tha Spahiu.