Milani merr tri pikë në udhëtim, përmbys 1-2 Comon

Serie A e futbollit në Itali zhvilloi mbrëmjen e së martës dy ndeshjet e prapambetura për javën e 19-të. Milani doli te tri pikët, ndërsa Atalanta dhe Juventusi barazuan 1-1. Këtë të mërkurë në orën 20:45 luhet Inter – Bologna.

Në “Giuseppe Sinigaglia” Como u përmbys 1-2 nga Milani. Pjesa e parë u mbyll në barazim pa gola, teksa spektakli ishte rezervuar për fraksionin e dytë. Ishte Diao në minutën e 60-të që kaloi në epërsi ekipin e Cesc Fabregas duke shokuar miqtë. Ekipi i Conceiçaos “u zgjua” dhe barazoi me Theo Hernandez në minutën e 71, para se Leao të gjente golin me vlerën e tri pikëve 14 minuta nga fundi i ndeshjes.

Në Bergamo vendasit e Atalantës barazuan 1-1 kundër Juventusit. “Zonja e Vjetër” ka harruar të fitojë dhe këtë sezon në Serie A ka arritur të ketë 13 barazime, më shumë se kushdo. Fakt është se ekipi i Mottas (e ndoqi ndeshjen nga tribuna pas pezullimit me karton të kuq) është ekipi i vetëm që nuk njeh humbje në elitën e futbollit në Itali. Sa i takon ndeshjes bardhezinjtë ishin më kërkues dhe në një rast u ndalën nga milimetrat. Dueli u zhbllokua nga Kalulu, që në minutën e 54 bëri rolin e “bomberit” te Juventusi. Më pas ishte goleadori Retegui që vendosi ekuilibrat në minutën e 78-të. Në këtë duel 90 minuta luajti Berat Gjimshiti, që paçka dëmtimit dhe dhjetë qepjeve mbi vetull pak ditë më parë ishte ndër lojtarët më të mirë në fushë.