ALARM PËR KARBURANTET/ NAFTA PRANË 100 DOLLARËVE, KRIZA TRONDIT TREGJET

Çmimi i naftës është ngjitur sërish fuqishëm, duke iu afruar pragut psikologjik të 100 dollarëve për fuçi, ndërsa tensionet në Lindjen e Mesme po shtojnë frikën për furnizimet globale me energji.

Nafta Brent është ngjitur rreth 99 dollarëve për fuçi, në një nga nivelet më të larta të javëve të fundit. Rritja vjen pas sulmeve ndaj disa qyteteve dhe objekteve energjetike në Arabinë Saudite, të cilat kanë shtuar pasigurinë në tregjet ndërkombëtare.

Autoritetet saudite kanë raportuar 73 persona të plagosur, mes tyre gra dhe fëmijë, ndërsa në disa zona janë regjistruar zjarre dhe dëme materiale. Pas sulmeve, operacionet në disa objekte energjetike janë ndërprerë përkohësisht, ndërsa autoritetet vijojnë vlerësimin e situatës.

Tregjet financiare kanë reaguar menjëherë ndaj zhvillimeve. Shqetësimi kryesor lidhet me mundësinë që një përshkallëzim i mëtejshëm i konfliktit të godasë furnizimet me naftë nga Gjiri Persik, një nga zonat më të rëndësishme energjetike në botë.

Në qendër të vëmendjes mbetet edhe Ngushtica e Hormuzit, përmes së cilës kalon një pjesë e konsiderueshme e tregtisë botërore të naftës. Trafiku detar në këtë zonë është reduktuar ndjeshëm, duke shtuar frikën për probleme të mëtejshme me transportin dhe furnizimin.

Presioni nuk po ndihet vetëm te nafta bruto. Edhe çmimet ndërkombëtare të dieselit dhe benzinës janë rritur, duke rikthyer shqetësimet për një valë të re inflacioni dhe për kosto më të larta transporti në shumë vende.

Një rritje e zgjatur e naftës mund të reflektohet gradualisht edhe në çmimet e karburanteve për konsumatorët, veçanërisht nëse tensionet në Lindjen e Mesme vazhdojnë ose zgjerohen.

Për momentin, Brent nuk e ka kaluar ende pragun e 100 dollarëve, por tregjet po ndjekin me shqetësim çdo zhvillim të ri në Arabinë Saudite, Gjirin Persik dhe Ngushticën e Hormuzit.