Nëse ai nuk do paqe, i uroj të ketë fat/ Trump nuk e pranon Zelenskyn në tryezë me Putinin

“Po flas me udhëheqësit evropianë dhe do të flas me Zelensky. Do të mbledh idetë e të gjithëve dhe do të shkoj plot energji. Dhe do të shohim se çfarë ndodhë”, – tha Donald Trump në një konferencë për shtyp përpara samitit të tij të 15 gushtit me Vladimir Putin.

“Do të flas me Vladimir Putinin, do t’i them: “Duhet t’i japësh fund kësaj lufte” dhe ai nuk do të tallet me mua.” Presidenti amerikan përsëriti bindjen e tij se Putin dëshiron t’i japë fund konfliktit, por kujtoi se e ka “zhgënjyer” atë në të kaluarën. Më pas ai kërcënoi se mund të braktisë negociatat nëse e kupton se një marrëveshje është e pamundur. Tha se është i sigurt se do ta kuptojë këtë “pas dy minutash takimi… sepse kjo është ajo që bëj unë”.

Trump siguroi gjithashtu se menjëherë pas bisedës me Putinin, “sapo të largohem nga dhoma”, ai do të telefonojë së pari Zelensky dhe më pas udhëheqësit evropianë. Nëse takimi shkon mirë, ai beson se kjo mund të çojë në një armëpushim, “menjëherë ose shumë shpejt”, por sqaroi: “Nuk varet nga unë të bëj marrëveshjen”.

Ai shpjegoi se vetëm Putini dhe Zelensky mund të përfundojnë një marrëveshje paqeje, e cila mund të përfshijë një shkëmbim territoresh midis dy vendeve. Në fund të fundit, qëllimi i tij është “t’i fusë të dy në një dhomë, pavarësisht nëse jam atje apo jo”. Megjithatë, nëse takimi shkon keq, “mund të largohem dhe të them, “Paçi fat”, dhe ky është fundi.

Mund të arrij në përfundimin se nuk do të ketë një zgjidhje”. Në atë rast, ai mund të telefonojë Zelenskyn dhe t’i thotë, “Paç fat, vazhdo të luftosh”. Ose mund t’i them se mund të bëjmë një marrëveshje”.

Një gazetar e pyeti Trumpin nëse e kishte ftuar Zelenskyn në Alaska. “Ai nuk është i përfshirë”, – u përgjigj presidenti amerikan. “Do të thoja se mund të shkonte, por ka qenë në shumë takime. Ka qenë atje për 3 vjet e gjysmë dhe nuk ka ndodhur asgjë”. Kancelari gjerman Merz, duke folur në telefon të dielën, thuhet se i kërkoi gjithashtu Trump të ftonte edhe Zelenskyn, por Trump u përgjigj se në këtë fazë të hershme, pjesëmarrja e udhëheqësit ukrainas mund të prishë përpjekjet për paqe, sipas burimeve që i thanë Wall Street Journal.

Në një lapsus Trump tha se do të shkonte në Rusi për samitin, por pak më pas theksoi se e konsideronte “shumë respektuese” që Putini kishte rënë dakord të vinte “në vendin tonë” në vend të vendit të tij ose në një vend të tretë.

Ai deklaroi se kishte “një marrëdhënie të shkëlqyer” me Putinin, edhe pse ai nuk ishte “mik i Rusisë” (ai kujtoi ndërprerjen e tubacionit Nord Stream 2 dhe dhënien e Javelins ukrainasve). Ai gjithashtu pretendoi se shkonte “mirë” me Zelenskyn, por tha se ishte “i shqetësuar nga fakti që ai thotë se ka nevojë për miratim kushtetues për një shkëmbim territoresh”. Ai shtoi se situata ishte e komplikuar nga fakti se rusët kishin pushtuar shumë territore të vlefshme (“me pamje nga oqeani”), por siguroi: “Ne do të përpiqemi të marrim disa mbrapsht”.

Komentet e presidentit amerikan vijnë pasi disa aleatë, të shqetësuar se Trump mund të bëjë një marrëveshje me Putinin pa ukrainasit dhe evropianët, e ftuan atë në një samit virtual të mërkurën, më 13 gusht, në orën 15:00, me iniciativën e Merz. Pjesëmarrësit përfshinin udhëheqësit e Gjermanisë, Francës, Britanisë së Madhe, Italisë, Polonisë, Finlandës, NATO-s dhe BE-së, si dhe Zelensky.

Kryeministri polak Donald Tusk shpjegoi se ai ka “shumë frikëra dhe shumë shpresa”, duke nënvizuar “taktikën e paparashikueshmërisë që ndonjëherë miratohet nga Trump”. Qëllimi i samitit virtual është të sqarojë “vijat e kuqe” të Evropës dhe Kievit: një armëpushim duhet të jetë hapi fillestar, përpara shkëmbimeve territoriale. Këto shkëmbime duhet të jenë reciproke dhe të bazuara në vijat aktuale të frontit dhe duhet të ketë garanci sigurie afatgjata për Ukrainën.

Sekretari i Përgjithshëm i NATO-s Mark Rutte i tha televizionit CBS se fitimet e Rusisë nuk duhet të njihen ligjërisht dhe se bisedimet duhet të adresojnë “situatën faktike që ata aktualisht kontrollojnë një pjesë të territorit ukrainas”. Shefja e Politikës së Jashtme të BE-së Kaja Kallas tha se ajo mbështet iniciativën e SHBA-së, por gjithashtu se BE po përgatit sanksione.