Lindja e Mesme në flakë/ SHBA fut 200 trupa në Arabinë Saudite, Houthit marrin portin strategjik

Tensionet në Lindjen e Mesme po përshkallëzohen, ndërsa Shtetet e Bashkuara kanë shtuar praninë ushtarake në Arabinë Saudite, në një kohë kur përplasjet me rebelët Houthi në Jemen janë intensifikuar.

Më shumë se 100 këshilltarë ushtarakë amerikanë ndodhen aktualisht në Arabinë Saudite, ndërsa numri i përgjithshëm i personelit amerikan të përfshirë në këtë operacion shkon në rreth 200.

Sipas raportimeve të CNN, trupat amerikane po ofrojnë kryesisht mbështetje në inteligjencë, përcaktimin e objektivave dhe monitorimin e zhvillimeve në fushëbetejë.

Megjithatë, Shtetet e Bashkuara nuk po marrin pjesë drejtpërdrejt në sulmet ndaj Houthive dhe nuk po ofrojnë mbështetje ajrore apo furnizim me karburant për avionët sauditë.

Angazhimi amerikan vjen në një moment të tensionuar në Jemen. Houthit kanë marrë kontrollin e një porti strategjik në Detin e Kuq, duke rritur shqetësimet për sigurinë e ngushticës Bab-el-Mandeb, një korridor i rëndësishëm për tregtinë ndërkombëtare.

Ndërkohë, grupi ka kryer edhe sulme me raketa dhe dronë ndaj Arabisë Saudite.

Uashingtoni akuzon Iranin se po mbështet Houthit dhe se pjesëtarë të Gardës Revolucionare iraniane ndodhen në Jemen. Sipas zyrtarëve amerikanë, shqetësimi kryesor është mundësia që Houthit të tentojnë të kufizojnë lëvizjen në Bab-el-Mandeb.

Përshkallëzimi mes Houthive dhe Arabisë Saudite ka rritur frikën se në Lindjen e Mesme mund të hapet një tjetër front konflikti.

Në Uashington ka gjithashtu shqetësime për përfshirje më të drejtpërdrejtë ushtarake, veçanërisht për shkak të rrezikut të viktimave civile.

Ndërkohë, prania amerikane në rajon mbetet e shpërndarë edhe në fronte të tjera, përfshirë zonën e Ngushticës së Hormuzit.

Zhvillimet e fundit rrisin shqetësimet për sigurinë e dy prej korridoreve më të rëndësishme detare në rajon dhe për mundësinë e një përshkallëzimi më të gjerë të konfliktit në Lindjen e Mesme.