Michael Carrick drejt shkarkimit nga Man United, Conte vendos 2 kushte për të marrë drejtimin e “Djajve të Kuq”

Stoli i Michael Carrick te Manchester United po vihet gjithnjë e më shumë në diskutim. Humbja e fundit 4-1 ndaj Comos ka shtuar zërat për shkarkimin e tij, ndërsa drejtuesit e klubit anglez, sipas raportimeve mediatike, kanë nisur kontaktet për të gjetur pasuesin.

Emri që po përmendet me insistim është ai i Antonio Contes. Mediat italiane dhe angleze raportojnë se përfaqësues të Manchester United kanë zhvilluar kontakte të drejtpërdrejta me njerëzit e trajnerit italian, për të diskutuar mundësinë e marrjes së drejtimit të “Djajve të Kuq”.

Por Conte nuk pranon të marrë drejtimin e skuadrës pa vendosur më parë rregullat e tij. Sipas gazetës italiane “La Repubblica”, trajneri ka paraqitur dy kushte që lidhen drejtpërdrejt me mënyrën se si Manchester United do të funksionojë nën drejtimin e tij.

Kushti i parë ka të bëjë me merkaton. Conte kërkon autoritet të plotë mbi strategjinë e transferimeve, duke synuar që çdo futbollist i ri të përputhet me skemën dhe filozofinë e tij taktike. Ai nuk dëshiron që drejtuesit t’i imponojnë lojtarë që nuk bëjnë pjesë në projektin e tij.

Kushti i dytë lidhet me stafin teknik. Italiani kërkon të zgjedhë vetë bashkëpunëtorët, pa detyrimin për të mbajtur pjesëtarë të strukturës aktuale të trajnerëve.

Nëse raportimet konfirmohen, Manchester United do të duhet të vendosë jo vetëm për largimin e Carrick, por edhe për kompetencat që është i gatshëm t’i japë trajnerit të ardhshëm.

Për momentin, mediat flasin për kontakte dhe kushte të vendosura nga Conte, ndërsa klubi anglez nuk ka konfirmuar një marrëveshje për ndryshimin e trajnerit.