HEGSETH ME KRYQ MBI SHPINE/ TRUMP GATI TE BEJ KURBANIN E PARE PAS HUMBJES NE ZGJEDHJE

Presidenti amerikan, Donald Trump është konsultuar me këshilltarët e tij për mundësinë e zëvendësimit të Sekretarit të Mbrojtjes, Pete Hegseth, pas rezultateve të pafavorshme të republikanëve në zgjedhjet e së martës. Sipas CBS News, lufta me Iranin dhe ndikimi i saj në rezultatin zgjedhor kanë nxitur diskutime brenda administratës amerikane.

Sipas raportimit, Trump dhe zëvendëspresidenti JD Vance e kanë përmendur luftën me Iranin si një ndër faktorët kryesorë që ndikuan në rezultatet negative të republikanëve.

Në këtë kontekst, disa këshilltarë të Shtëpisë së Bardhë presin që përgjegjësia politike për humbjet të përfshijë edhe drejtues të lartë ushtarakë, mes tyre komandantin e Komandës Qendrore të SHBA-së, admiralin Brad Cooper, dhe kryetarin e Shefave të Përbashkët të Shtabit, gjeneralin Dan Caine.

Megjithatë, burime të tjera i kanë thënë CBS News se presidenti amerikan nuk ka marrë ende ndonjë vendim për largimin e Hegseth nga detyra.

Mes emrave që po diskutohen për drejtimin e Pentagonit është edhe guvernatori republikan i Floridës, Ron DeSantis. Një burim i cituar nga CBS News ka bërë të ditur se DeSantis mund të jetë një alternativë për zëvendësimin e Hegseth. Sipas këtij skenari, Senati mund të shqyrtojë konfirmimin e tij gjatë periudhës së tranzicionit parlamentar, përpara se guvernatori të përfundojë mandatin më 5 janar.

Ndërkohë, ligjvënësit demokratë kishin ndërmarrë përpjekje për largimin e Hegseth edhe përpara zgjedhjeve të mesit të mandatit. Një shumicë e konsiderueshme demokrate në Kongres mund t’u jepte atyre më shumë hapësirë për të avancuar nismat kundër tij, megjithëse procedurat për shkarkimin e një zyrtari federal kërkojnë hapa të veçantë kushtetues.

Pavarësisht raportimeve për diskutime të brendshme, Shtëpia e Bardhë ka deklaruar se presidenti vazhdon të mbështesë Sekretarin e Mbrojtjes. E pyetur nga CBS News për të ardhmen e Hegseth, zëdhënësja e Shtëpisë së Bardhë, Anna Kelly, deklaroi se Trump ka besim të plotë te Sekretari Hegseth.