Endri Shabani i nismës “Thurrje” nuk e përjashton mundësinë e bashkëpunimit me Lulzim Bashën, madje thotë se për “zbritjen e Ramës nga maxhoranca” duhet të ketë sa më tepër bashkëpunime midis forcave të reja politike.

Në emisionin “Breaking”, Shabani tha se e ashtuquajtura aleanca anti-SPAK, është e qartë që tashmë përbëhet nga Sali Berisha, Ilir Meta dhe Edi Rama, të cilët sipas tij, edhe me veprime konkrete kanë treguar se janë kundër drejtësisë së re.

“Sot Ilir Meta, Sali Berisha, Edi Rama janë përballë SPAK-ut. Natyralisht ata do të bëhen bashkë për të mbrojtur veten para drejtësisë. S’ka nevojë as për konspiracion këtu. Ne i pamë të bëhen bashkë për Amnistinë, që fali 100 personazhe që janë dënuar nga GJKKO. Këta janë bashkë, këta me votat e tyre kanë falur 60 hajdutë të Edi Ramës. Këta janë ekspozuar, këtu duhet të kishte mbaruar filmi”, u shpreh Shabani

I pyetur për mundësinë e bashkëpunimit me Bashën, Shabani tha se kreu i PD-së zyrtare “duhet ndarë” nga Berisha, Meta dhe Rama.

Basha duhet ndarë nga Berisha, Meta, Rama. Njëkohësisht Basha duhet ndarë nga Adriatiku, Arlindi. Por të njëjtin mendim do kisha dhe për Dashamir Shehin. Ka disa forma bashkëpunimi, për beteja të përbashkëta, ka bashkëpunim para dhe pas zgjedhor. Të njëjtën gjë mund ta bëjmë nesër në Parlament, me idenë ta zbresim Ramën nga maxhoranca në Parlament”, u shpreh ai.

Avokati Spartak Ngjela ka treguar se SPAK, përpos ‘rrjetës së madhe’ të hetimit të nivelit të lartë, ka edhe probleme të brendshme.

I ftuar në “Top Talk”, ai ka deklaruar se katër persona brenda SPAK-ut do të largohen pasi kanë shkelur ligjin.

“SPAK-un e paguan Washington. Kush paguan të drejton, ata drejtojnë në konceptin e drejtë të ligjit. Mendoni se rrogat e SPAk-ut i paguajmë ne? Jo. Sipas burimeve të ndërkombëtarët, SPAK-u ka probleme me korrupsionin.

Janë të trembur, më kanë thënë. Krimi i organizuar godet, siç duket ka probleme të brendshme vetë SPAK. Ta lëmë deri këtu, të shohim sesi do të vazhdojë.

Reforma në drejtësi këtu bëhet nga ndërkombëtarët. Shqipëria e ka të nevojshëm luftën antikorrupsion”-deklaroi Ngjela.

Bashkëkryetarja e PS në Athinë, Arminda Plangarica, në një intervistë për Report Tv ka zbuluar detaje nga takimi i kryeministrit Edi Rama me shqiptarët në Athinë të dielën e 12 majit. Për diasporën në Athinë, Plangarica thotë se kjo është një festë duke qenë se Rama shkon pas kaq shumë viteve në një takim të tillë.

Në stadiumin ‘Galatsi’, në sallën “Teatri i Krishtlindjeve”, pritet të jenë rreth 4 mijë persona thotë Plangarica. Për emisionin ‘Studio Live’ me gazetarin Arbër Hitaj, bashkëkryetarja e PS në Athinë thotë se do të ketë performancë nga grupe artistike, por edhe nga reperi Noizy, ndërsa përflitet edhe këngëtarja e njohur Eleni Foureira.

Ky takimin pritet të zgjasë më shumë se tre orë, ndërsa më pas kryeministri do të zhvillojë takime me strukturat e PS në Athinë.

‘Është një festë, pas shumë viteve vjen kryeministri. Vjen me një platformë për të gjithë diasporën, nuk i drejtohet vetën strukturave të PS, por  i drejtohet diasporës në total. Përbën festë për ne, paraqitja  e tij në Athinë, kemi marrë masat që ta presim siç e takon me grupe artistike, fëmijë nga diaspora që do japin mesazhi e së ardhmes, do vijë Noizy, Eleni Foureira. Vetëm mbrëmë morëm konfirmimin e sallës ku do mbahet ky eveniment, gjithçka është në zhvillim. Do jetë më shumë se 3 orë, më pas do ketë edhe takime të Ramës me struktura të PS”, tha Arminda Plangarica.

Sipas saj, polemikat që u krijuan në Greqi për shkak të vizitës së Ramës kanë nxitur më shumë emigrantë që të marrin pjesë në takim.

“Priten rreth 4 mijë persona. Pas gjithë kësaj polemike që u krijua me Athinën, nëse njerëzit do të donin 1 herë të shikonin Ramën, pas situatës që mundi të menaxhojë Rama me maturi politike, tani duan 10 herë të shohin kryeministrin.

Qëndrimi i tij tepër i mataruar, i bëri shqiptarët të mos jenë skeptikë përballë këtij takimi, biles të jenë të vendosur që do e shohin kryeministrin. Pati një mesazh që nëse Greqia s’do na lejojë takimin me kryeministrin do shkojmë ne ta takojmë, nuk e thanë anëtaret e PS, e thanë individë të të gjitha ngjyrave politike”, u shpreh ajo.

Sipas saj, kjo çështje është përdorur edhe politikisht, si nga partia e Mitsotakis edhe nga opozita, në kohën kur Greqia po përgatitet për zgjedhjet parlamentare europiane.

“Takimi i Ramës përkoi me zgjedhjet parlamentare europiane, kanë problematikat e veta. Partia në pushet por edhe partitë opozitare brenda territorit grek kanë problemet e tyre politike, ekonomike. Ditët e fundit ka pasur skandale ekonomike dhe politike. Çdo parti lufton të marrë vendet e veta në PE. Plagët gjithmonë shërohen me nacionalizmin e theksuar. Nacionalizmi që u shfaq që shtypin grek qe një balsam shërues për plagën që ka shoqëria greke në këtë moment”, vijoi Arminda Plangarica./m.j

Ndërsa dhe dy ditë në ndajnë nga vizita e kryeministrit Edi Rama me shqiptarët në Greqi, ish-kryeministri Sali Berisha i kë bërë thirrje të heqë dorë.

Berisha u shpreh se nuk mund të shkojë ‘në djepin e demokracisë, kur je vendi i vetëm sot, përveç diktaturave të egra, që nuk njeh prezumimin e pafajësisë’.

“Edi Rama, hiq dorë, mos provoko diasporën sepse atje ku janë, jetojnë në një vend të lirë.

Vullneti shndërrohet në votë dhe vota në pushtet, në liri, në të drejta.

Kurse këtu krimi shndërrohet në votë dhe vota në krim, në pushtet krimi.

Këtu arrestohen drejtuesit e opozitës pa asnjë fakt, pa asnjë dokument, vetëm se të lëkundin ty karrigen e pushtetit dhe nuk do fitosh kurrë.

Këtu arrestohen qeveritarë vendorë sepse bënë pluhur ëndrrat e tua për parajsën tënde familjare, qeveritare në brigjet e Himarës.

Si mund të shkosh ti në Greqi, në djepin e demokracisë, kur je vendi i vetëm sot, përveç diktaturave të egra, që nuk njeh prezumimin e pafajësisë?

Edi Rama, në këtë udhëtim ti shkon si turpi i Shqipërisë.

Si turpi i shqiptarëve.

Si turpi i Europës.

Si faqja e zezë e demokracisë!

Miqtë e mi, a mund të shkojë diasporën njeriu që me varfërim të tmerrshëm përmes vjedhjeve, i zboi shqiptarët nga Shqipëria?

Në vitin 2013, Shqipëria rritej çdo vit në popullsi.

Shqiptarët kishin rrogat më të larta në rajon.

Rreth 180 mijë shqiptarë u kthyen nga emigracioni për të ndërtuar këtu folenë e të ardhmes së tyre në vendin e tyre.

Kurse ti me vjedhjet si i pangopur, me vjedhjet 100 përqind, me inceneratorin, me sterilizatorët, me Porton Romanon, me Portin e Durrësit, me 6 milionë metër katrorë me trafikantët e tu, i varfërove shqiptarët nga viti në vit dhe i vidhise ata përsëri në honet e varfërisë.

Detyrove fëmijët e tyre të marrin rrugët e dheut për fatin e tyre.

Nuk ke të drejtë të takosh ti diasporën.

Ti je një Makbeth i vërtetë i kombit shqiptar”, tha Berisha.

Përfaqësuesit e diplomasisë amerikane dhe asaj evropiane në Tiranë shfrytëzuan një konferencë mbi ditën e drejtësisë të mbajtur të premten në Tiranë për të siguruar publikun e gjerë por edhe funksionarët e sistemit të drejtësisë për mbështetjen për Strukturën e Posaçme Kundër Krimit të Organizuar dhe Korrupsionit përkundrejt deklaratave me nënkuptime të funksionarëve të ndryshëm të maxhorancës socialiste dhe spekulimeve se SPAK mund të vendoset nën sulm nga të dyja krahët e politikës, siç duket, të pakënaqura me hetimet e deritanishme mbi korrupsionin, abuzimin me detyrën apo shkeljen e barazisë në tenderë.

I ngarkuari me Punë i SHBA-në në Shqipëri, David Wisner, u shpreh se “Reforma në Drejtësi dhe suskseset e saj janë të pakthyeshme” ndërsa nuk i kurseu lavdet për rezultatet e deritanishme.

“Ne presim tërësisht që institucionet që u krijuan 112 vjet më parë, u krijuan më 2016, do të jenë këtu për një kohë të gjatë. Nuk ka diskutime për këtë sepse është populli shqiptar që është shprehur se e do këtë,” tha Wisner.

Duke iu drejtuar zyrtarëve të sistemit të drejtësisë, Wisner tha se “puna juaj për të përmirësuar qeverisjen, sundimin e ligjit dhe anti-korrupsionin janë premtuese.” Por ai shtoi se “më shumë duhet të bëhet nga politikanët, nga institucionet dhe nga çdokush që është i interesuar për një demokraci më të fortë në Shqipëri.”

I njëjti mesazh u përcoll dhe nga ambasadori i BE në Tiranë, Silvio Gonzato i cili tha se “reforma në drejtësi duhet çuar para dhe këto rezultate duhet t’u shërbejnë qytetarëve”.

“Reforma në drejtësi është e pakthyeshme, dhe arritjet e SPAK duhet të jenë të tilla”- theksoi ai duke shtuar se “BE e mbështet sistemin e drejtësisë dhe do të mbrojë të gjithë institucionet e drejtësisë”.

Mesazhet e kumbarëve të kësaj reforme që u miratua në vitin 2016 me konsensus politik vijnë në një moment kur ka zëra nga mazhoranca që aludojnë për një jetëgjatësi afatshkurtër të Strukturës së Posaçme kundër Korrupsionit (SPAK).

Një javë më parë gjatë një interviste në Televizionin Publik ministri i Drejtësisë Ulsi Manja e cilësoi këtë strukturë si të përkohshme me afat 9-vjeçar, ndërkohë që prokurorët kanë një mandat 9-vjeçar pa të drejtë rikandidimi.

Deklaratat shumëkuptimëshe dhe spekulimet se dy palët kryesore politike mund të kenë rënë dakord pas dyerve të mbyllura për ndryshime ligjore që mund të cënojnë Strukturën e Posaçme Kundër Krimit të Organizuar dhe Korrupsionet besohet se sakaq kanë krijuar pasiguri mes prokurorëve dhe gjyqtarëve, të cilët përballen rregullisht me sulme apo me opinione negative nga të dyja krahët e politikës.

Çështja kryesore në diskutim është fati i prokurorëve të SPAK pasi mandati i tyre kushtetues mbaron. Ky mandat është nëntëvjeçar. Dy ide kryesore qarkullojnë në këtë kontekst, njëra që prokurorëve të SPAK t’u lejohet një mandat i dytë ose pa afat dhe tjetra që në fund të mandatit, të mund t’u garantohet një vend pune në prokurorinë e apelit të Tiranës.

Puna e SPAK ka krijuar shqetësime në të dyja krahët e politikës me hetimin e ish-zyrtarëve të lartë shtetërorë.

Së fundmi mazhoranca ka ndërmarrë një iniciativë për një komision të posaçëm parlamentar bipartizan për të analizuar punën e drejtësisë dhe për të ndërmarrë reforma të reja, që sipas saj, do të ndihmojë në luftën anti-korrupsion. Ndonëse socialistët këmbëngulin që përpjekja e tyre nuk synon të godasë SPAK, vetë diskutimi nëse synon apo jo duket se mjafton për të krijuar presion të papërshtatshëm mbi ta.

Wisner tha se SHBA do të mbështesë përpjekjet për reforma por la të kuptohet se këto reforma duhet të jenë “në përputhje me Kushtetutën dhe pavarësinë e gjyqësorit.”

Partnerët perëndimorë të Shqipërisë, SHBA dhe BE, janë përballur disa herë në të shkuarën me maxhorancën qeverisëse në lidhje me pavarësinë e sistemit gjyqësor. Në rastin më domethënës, në dhjetor të vitit 2022, ish-ambasadorja amerikane Yuri Kim bëri disa deklarata të tensionuara në lidhje me procesin e përzgjedhjes së drejtuesit të SPAK dhe paralajmëroi për rrezikun e ndërhyrjes politike në proces ndërsa kryeministri Edi Rama iu përgjigj në një rast duke thënë se kreun e SPAK “nuk e zgjedh ambasada.” /BIRN/