Goditje ndaj drogës dhe krimit/ Drejtori i Policisë ‘zbarkon’ në Elbasan

Drejtori i Policisë së Shtetit vijon takimet në terren, ndalesë në Elbasan për forcimin e sigurisë dhe goditjen e paligjshmërisë.

Pas vizitës në Korçë, drejtori i Policisë së Shtetit, Skënder Hita, është ndalur në qytetin e Elbasan, ku ka zhvilluar një takim pune me drejtuesit vendorë të policisë.

Burime jo zyrtare bëjnë me dije se në qendër të diskutimeve kanë qenë porositë e qarta të kreut të policisë për rritjen e efikasitetit në luftën kundër paligjshmërive, me fokus të veçantë goditjen e veprimtarive që lidhen me lëndët narkotike.

Një tjetër prioritet i theksuar gjatë takimit ishte edhe forcimi i masave për garantimin e sigurisë në shkolla, duke kërkuar angazhim maksimal nga strukturat vendore për parandalimin e incidenteve dhe rritjen e bashkëpunimit me institucionet arsimore.

Takimi në Elbasan vjen në kuadër të një turi inspektimesh dhe analizash që drejtori Hita po zhvillon në disa qarqe të vendit, me synim përmirësimin e rendit dhe sigurisë publike.