Lufta/ SHBA dhe Irani “shumë pranë” marrëveshjes, por ende pa dakordësi finale

Shtetet e Bashkuara dhe Irani mbeten pranë një marrëveshjeje për zgjatjen e armëpushimit dhe nisjen e negociatave mbi programin bërthamor iranian, por ende nuk kanë arritur dakordësinë përfundimtare.
Zëvendëspresidenti amerikan JD Vance deklaroi se palët po negociojnë ende mbi disa “pika të gjuhës”, përfshirë çështjen e pasurimit të uraniumit.
“Ende nuk jemi aty, por jemi shumë afër dhe do të vazhdojmë të punojmë për këtë”, tha Vance para gazetarëve në Washington.
Sipas raportimeve, draft-marrëveshja do të zgjasë armëpushimin me 60 ditë dhe do të hapë negociata për të ardhmen e programit bërthamor të Iranit. SHBA-të kërkojnë që Teherani të ndalojë prodhimin e uraniumit të pasuruar në nivele të larta dhe të heqë dorë nga rezervat ekzistuese, të cilat teorikisht mund të përdoren për armë bërthamore.
Mediat amerikane raportojnë se marrëveshja mund të përfshijë edhe rihapjen e kalimit të lirë në Ngushticën e Hormuzit, heqjen graduale të bllokadës amerikane dhe lehtësime të sanksioneve për eksportet iraniane të naftës.
Megjithatë, agjencia iraniane Tasnim mohoi se marrëveshja është finalizuar, ndërsa Shtëpia e Bardhë hodhi poshtë raportimet për një memorandum të dakordësuar mes palëve.
Presidenti Donald Trump, i cili sipas Axios është informuar mbi propozimin, ende nuk ka dhënë miratimin përfundimtar.
Ndërkohë, tensionet në terren vazhdojnë. Garda Revolucionare Iraniane pretendoi se ka goditur një bazë amerikane në rajon, ndërsa media shtetërore iraniane raportoi rrëzimin e një avioni amerikan pa pilot. Komanda Qendrore e SHBA-ve i mohoi pretendimet, duke deklaruar se “asnjë avion amerikan nuk është rrëzuar”.