Netanyahu: Kabineti do të mblidhet të enjten për të miratuar marrëveshjen për Gazën

Presidenti i SHBA-së, Donald Trump, ka njoftuar se “Izraeli dhe Hamasi kanë nënshkruar Fazën e parë të Planit tonë të Paqes”.
Kjo fazë përfshin lirimin e pengjeve dhe tërheqjen e trupave izraelite sipas dakordimit.
“Kjo do të thotë që TË GJITHË pengjet do të lirohen shumë shpejt dhe Izraeli do të tërheqë trupat e tij në një vijë të rënë dakord si hapat e parë drejt një Paqeje të Fortë, të Qëndrueshme dhe të Përjetshme. Të gjitha palët do të trajtohen në mënyrë të drejtë!
Kjo është një DITË E MADHE për Botën Arabe dhe Muslimane, Izraelin, të gjitha kombet përreth dhe Shtetet e Bashkuara të Amerikës, dhe ne falënderojmë ndërmjetësit nga Katari, Egjipti dhe Turqia, të cilët punuan me ne për ta bërë të mundur këtë Ngjarje Historike dhe të Paparë”, ka shkruar Trump në rrjetet sociale.
Një zyrtar i Katarit ka thënë se marrëveshja do të “çojë në përfundimin e luftës, lirimin e pengjeve izraelite dhe të burgosurve palestinezë, si dhe hyrjen e ndihmave”.
Netanyahu: Kabineti do të mblidhet të enjten për të miratuar marrëveshjen për Gazën
Kryeministri Benjamin Netanyahu tha se do të mbledhë kabinetin të enjten për të miratuar armëpushimin në Gaza dhe marrëveshjen për lirimin e pengjeve.
“Një ditë e madhe për Izraelin. Do ta mbledh qeverinë nesër për të miratuar marrëveshjen dhe për të sjellë të gjithë pengjet tona të çmuara në shtëpi”, shkroi ai në X.
“Falënderoj ushtarët heroikë të IDF-së dhe të gjitha forcat e sigurisë, falë guximit dhe sakrificës së të cilëve kemi arritur në këtë ditë. Falënderoj Presidentin Trump dhe ekipin e tij nga thellësia e zemrës për angazhimin e tyre ndaj këtij misioni të shenjtë të lirimit të pengjeve tona”, shtoi Netanyahu.
“Me ndihmën e Zotit, së bashku do të vazhdojmë të arrijmë të gjitha qëllimet tona dhe të zgjerojmë paqen me fqinjët tanë”.