“Nuk e duroja dot”/ Edukatorja pranon dhunën ndaj 2-vjeçarit, zbardhet dëshmia

Një edukatore e një kopshti privat në Tiranë është arrestuar pasi dyshohet se ka ushtruar dhunë fizike ndaj një fëmije 2-vjeçar. Ngjarja është denoncuar nga babai i të miturit, i cili ka vënë re shenja në fytyrën e fëmijës dhe ka kërkuar verifikimin e gjendjes së tij shëndetësore.

Sipas informacioneve të bëra publike nga autoritetet, fëmija është dërguar për ekzaminim mjekësor, ku janë konstatuar dëmtime të lehta në zonën e fytyrës dhe veshit. Edukatorja, Brunilda Haxhiu, 32 vjeçe, është ndaluar nga policia dhe çështja i është referuar Prokurorisë për hetime të mëtejshme.

Gjatë marrjes në pyetje, ajo dyshohet se ka pranuar se e ka goditur fëmijën, duke deklaruar se veprimi ka ndodhur pasi i mituri nuk po flinte. Ndërkohë, autoritetet po shqyrtojnë edhe pamjet e kamerave të sigurisë së kopshtit, si pjesë e hetimit për të sqaruar rrethanat e plota të ngjarjes dhe përgjegjësitë ligjore.

Hetimet vijojnë për përcaktimin përfundimtar të fakteve dhe masave që do të merren nga organet kompetente.