ZHEGROVA BEN GATI VALIXHET/ NGA STOLI I JUVENTUSIT, TE DRITA E SHPETIMIT NE STAMBOLL

Nga Torino drejt Stambollit, Edon Zhegrova mund të nisë një kapitull të ri në karrierën e tij. Sulmuesi i Kosovës nuk po arrin të gjejë hapësirat e dëshiruara te Juventusi dhe largimi nga skuadra italiane në merkaton e janarit po shfaqet gjithnjë e më shumë si një mundësi konkrete.

Në skenë rikthehet Besiktasi. Klubi turk kishte tentuar ta transferonte 27-vjeçarin edhe gjatë merkatos së verës, por negociatat nuk prodhuan një marrëveshje. Tashmë, skuadra nga Stambolli mund të rihapë pistën për futbollistin dardan, të cilin e konsideron një alternativë të preferuar për krahun e djathtë të sulmit.

Sipas raportimit të medias “GettoSport”, Zhegrova është ndër emrat që pëlqehen nga drejtuesit e Besiktasit, të cilët synojnë të përforcojnë repartin ofensiv.

Se aventura në Torino nuk ka shkuar sipas pritshmërive, e tregojnë edhe minutat e aktivizimit. Në tetë ndeshje të Serie A këtë sezon, sulmuesi kosovar është aktivizuar gjithmonë nga stoli, duke grumbulluar vetëm 214 minuta lojë. Megjithatë, në këtë kohë të kufizuar ka arritur të shënojë dy gola dhe të japë dy asistime.

Transferimi, sidoqoftë, nuk pritet të jetë i lehtë. Zhegrova është i lidhur me Juventusin me kontratë deri në vitin 2030, ndaj çdo lëvizje do të kërkonte një marrëveshje mes dy klubeve.

Për Besiktasin, afrimi i tij do të sillte shpejtësi, teknikë dhe aftësi të veçanta në duelet një kundër një. Ndërsa për Zhegrovën, Stambolli mund të shndërrohet në destinacionin ku të rifitojë minutat, besimin dhe rolin protagonist që deri tani i ka munguar në Torino.

Janari mund të sjellë kështu një kthesë të rëndësishme: nga stoli i Juventusit, drejt një aventure të re në futbollin turk.