Kurti takon Jovanoviç, diskutojnë për raportet Kosovë-Serbi, përmendet edhe Banjska

Kryeministri i Kosovës, Albin Kurti, priti në takim politikanin liberal nga Serbia, Çedomir Jovanoviç.

Në një komunikatë për media bëhet e ditur se në takim u bisedua rreth zhvillimeve të fundit në Kosovë dhe Serbi, si edhe për raportet ndërmjet dy vendeve.

Kurti e Jovanoviç gjithashtu diskutuan mbi nevojën e fuqizimit të sundimit të ligjit në Ballkanin Perëndimor, rëndësinë e demokratizimit të shoqërive dhe institucioneve, pluralizmit politik, respektimin e të drejtave të njeriut dhe të pakicave kombëtare si garant të paqes dhe sigurisë në gjithë rajonin.

Edhe Kryetari i Partisë Liberal Demokratike, Çedomir Jovanoviç, ka njoftuar se eshte takuar dhe ka biseduar me kryeministrin e Kosovës, Albin Kurti.

“Kurtin e njoh prej 30 vitesh. Ai dhe unë kemi kaluar shumë gjëra në jetën tonë dhe pas këtyre bisedave besoj se gjaku i derdhur në Banjskë është gjaku i fundit i derdhur në konfliktin mes popullit serb dhe shqiptar në Kosovë. Se kockat që mbetën aty dhe jetët e humbura janë të fundit, dhe janë çmimi që paguajmë për keqkuptimin historik të dy popujve tanë” – ka shkruar Jovanoviç në një postim në rrjetin social X.