Ekzekutimi i Eno Nikulajt, si vrasësit e ndoqën viktimën për 4 orë

Për rreth 4 orë autorët e vrasjës së Entjan (Eno) Nikulajt e kanë ndjekur objektivin e tyre dëri në ekzekutimin e tij.

Burimet për Ora News kanë bërë të ditur se rreth orës 18:30 të së shtunës makina BMW ngjyrë gri me targa të vjedhura është nisur nga Fushë Kruja dhe i është vënë në ndjekje.

Intenerari i agresorëve është zbuluar nga gjurmimi i kamerave të sigurisë në rrugë dhe në biznese. Besohet se 3 autorët kanë qënë në dijeni të lëvizjes së 40-vjeçarit. Në kohën kur viktima ka lënë Shëngjinin për të hyrë në Lezhë autorët kanë nisur më zbatimin e planit.

Për të realizuar vrasjen kanë zgjedhur një zonë ku nuk ka pasur vëzhgim me kamera, duke bërë që të mos zbardhen veprimet në momentin final. 7 plumba kanë rënë mbi trupin 40-vjeçarin, i cili humbi jetën në vend. Autorët janë larguar me të njëjtën automjet, ndërsa makina ka përshkruar të njëjtin intenerar, duke u kthyer në Fushë-Krujë.

Pikërisht në vendin e quajtur “Ura e Tubit” kanë djegur makinën ku u gjetën dhe dy automatik. Policia e Shtetit nuk ka dyshime që pas kësaj ngjarjeje fshihen vrasës profesionistë. Nisur edhe nga lëvizja e makinës, para dhe pas ngjarjes, dyshohen se grupi vepron në zonën Fushë-Krujës, Krujës dhe përreth saj.

Pritet që në ditët në vijim t’u kërkohet operatorëve telefonikë për të marrë tabulatet në zonën ku ndodhi krimi.