Presidenti i Vietnamit Vo Van Thuong ka dhënë dorëheqjen pas vetëm një viti në detyrë.
Pas një takimi të Partisë Komuniste në pushtet të mërkurën, qeveria tha se ai kishte thyer rregullat e partisë dhe kishte ndikuar negativisht në reputacionin e saj.
Në një vend të njohur për stabilitetin e tij politik, të zbatuar rreptësisht nga partia, një president sapo është detyruar të japë dorëheqjen për herë të dytë në pak më shumë se një vit, shkruan BBC
Vo Van Thuong, në moshën 53 vjeçare, ishte më i riu që mbajti ndonjëherë këtë pozicion.
Me dorëheqjen e tij, të konfirmuar të enjten nga Asambleja Kombëtare, ai është edhe mandati më i shkurtër.
Paraardhësi i tij Nguyen Xuan Phuc dha dorëheqjen vitin e kaluar, pas vetëm dy vitesh në detyrë. Të dy Presidentët ishin të njollosur nga shoqërimi me skandale korrupsioni
Shpjegimi i dhënë nga qeveria nuk zbulon shumë për arsyet. Ai thekson vetëm se Presidenti Thuong “shkel rregullat e partisë dhe se ai kishte mangësi që ndikuan në opinionin publik dhe reputacionin e partisë, shtetit dhe të tij”.
Megjithatë, supozohet se ai ka dhënë dorëheqjen për akuzat për mashtrim dhe ryshfet që po bëhen kundër zyrtarëve dhe një biznesi pronash në provincën e Quang Ngai, ku dikur ishte shefi i partisë lokale. Çështja daton më shumë se një dekadë, por tashmë po ndiqet nga policia, duke ngritur dyshime se pas hetimit mund të ketë motive politike.
