Plani B i Sali Berishës për 2025-n

Nga Ylli Pata

Pavarësisht se duket që pakti i foltores me mazhorancën po mban në lojë një teatër polik buratinësh që do të bëjë zhurmë, apo trazira emocionale e Ilir Metës që i është shkrepur të bëhet Spider Man, nuk duket se jemi në sagë të re “Superheronjsh”.

Gjasat janë se po gatitet një plan krejt ndryshe nga ajo që duket në zhurmën e paneleve apo konferencave të shtypit.

Sinjali që u dha me katapultimin e një simbolike të rëndësishme siç është Gjin Gjoni, tregon se Sali Berisha po shkon drejt një përgatitje jo për zgjedhje, po për një përplasje jashtë politike jo thjesht me mazhorancën po me sisitemin politik.

Politikisht, ajo zgjedhje nuk ka as karakter elektoral, pasi nuk është provuar fuqia politike e Gjin Gjonit për të tërhequr vota të elektoratit gri, por edhe organizativ, pasi ish-anëtari i KLD nuk ka drejtuar asnjë seksion të PD-së në territor gjithë këto vite.

Por, sinjali që ka dashur të japë Sali Berisha është krejt tjetër. Që flet më shumë sesa deklaratat e kryetarit të ri të degës së Lezhës. Ai ishte një personazh që u kthye në kryesimbolin e betejës së SHBA për reformën në drejtësi në Shqipëri.

Ambasadori Donald Lu, kur përmendi metaforën e famshme të “orave të gjyqtareve”, mori spunto pikërisht nga sahati i dorës së Gjin Gjonit, që ekspozohej glamur në fotot ku ish-gjyqtari shfaqej në mbledhjet zyrtare të Këshillit të Lartë të Drejtësisë.

E kjo lëvizje e Berishës, më shumë se karshillëk politik ndaj amerikanëve, është një aksion, një demostrim për të komunikuar me armiqtë realë të tij, të cilët janë në Uashington.

Sot pas vendimit të Gjykatës së Lartë që konfirmon arrestin në shtëpi të Sali Berishës, në median pranë tij ka nisur një sulm frontal i kolonelëve të doktorit ndaj drejtësisë së re.

Sipas tyre, institucionet e drejtësisë janë mbushur me njerëz të lidhur familjarisht me mazhorancën, duke akuzuar për lidhje me Partinë e Punës dhe Sigurimin e Shtetit.

Natyrisht që e gjithë kjo është për të mbushur ndjekësit e tyre me propagandë toksike, pasi një nga personazhet më të lidhura me PPSH-në është njeriu që drejton foltoren nga dritarje. Kurse deputetët e tij, siç theksonte edhe raporti i fundit i Autoritetitt ë Dosjeve, nuk kanë kërkuar asnjëherë që të zbardhet skeda e tyre e dosjeve të -ish-Sigurimit të Shtetit.

Pas humbjes katastrofale të zgjedhjeve të 14 majit, nisjes së hetimeve penale e sekuestrimin e pronave, Sali Berisha nuk ka gjasa që të shkojë në zgjedhje si “cjapi te kasapi”.

Në fakt, si vetë Berisha, ashtu edhe besnikët e tij si Flamur Noka e të tjerë, e kanë shprehur publikisht se ata nuk do të hyjnë në zgjedhje me këtë qeveri. Natyrisht është një frazë shtampë, ku edhe pse logjika mbetet e njëjtë, për formën dhe metodat gjithçka po hartohet, madje ka gjasa të jetë plani gati.

Mbetet pra vetëm nisja e asaj që po konsiderohet jo më një “revolucion”, po një guerrilje e re, e cila ka shumë gjasa që të mos jetë frontale.

Protestat me shënjestër kreun e bashkisë së Tiranës, janë vetëm sinjalet e para të kësaj guerilje. Ku me anë të një fushate gossipi që shpërndahet në studio, po mundohet të konsiderohet si një “Pazar i mbyllur me Edi Ramën”.

Megjithatë, situata sot është krejt ndryshe nga herët e vitet e tjera. Pas paktit me mazhorancën për amnistinë, që ishte një sinjal tjetër antiamerikan i dallueshëm në përmbajtjen e draftit, Sali Berisha ka objektiv të radhës marrjen e vulës së PD-së. E një goditje e fortë, sipas gjasave është planifikuar përpara vendimit të Gjykatës së Apelit për këtë çështje. Ndërkaq, loja për të hequr masën e arrestit shtëpiak, duket se është më shumë manovër tymuese. Berishës i leverdis më mirë tisi i martirit përballë ndjekësve se një demonstrim inati në sallën e Kuvendit. Në arrest shtëpie, doktori shkoi me këmbët e veta, duke refuzuar që të paraqitej në prokurori.

Një marrje në pyetje do ta dërrmonte më shumë, sesa performance e dritares, e cila edhe pse një fabul e sforcuar, e mbron nga ekspozimi i tepërt. Madje edhe djegia e mandatit ka shumë gjasa që t’i interesojë më shumë, por veç do të kërkojë ta shesë sa më shtrenjtë…