Dyer të blinduara e një shtëpi e tërë nëntokë, ç’fshihet poshtë tregut agro-ushqimor në Elbasan (FOTO)

Tregu “agro-ushqimor” në Elbasan është vënë shpesh herë në fokus të kronikave të zeza, për shkak se është në pronësi të Petrit Çelës, babai i Suel Çelës (Marjus Lulaj). Ky i fundit është një prej të shumë-kërkuarve nga Policia, teksa është shpallur prej kohësh në kërkim nga SPAK.

Gjithashtu, aty ka ndodhur dhe një ngjarje e rëndë më 18 shtator të 2017-së. Në këtë datë në mbrëmje para tregut Agro-Ushqimor Policia ndaloi një Range-Rover ku brenda tij ishin Enea Bekteshi e Kelmend Xhaferri. Por në momentin që policët po largoheshin, një Audi i blinduar vjen drejt makinave të uniformave blu dhe në këtë moment përplasen me njëra-tjetrën. Sipas Prokurorisë Policia ishte në aksion dhe Audi që drejtohej nga Suel Çela ka goditur me qëllim makinën e Gjergji Oshafit.

Tregu “agro-ushqimor” në Elbasan ka qenë shpesh herë objekt i kontrolleve të Policisë për kapjen e Suel Çelës, por gjithmonë nga aty kanë dalë “duar bosh”.

Por, përveçse një treg agro-ushqimor, në ambientet nëntokësore të tij ndodhet një “apartament” i tërë dhe pamjet zbulohen për herë të parë.

Siç shihet dhe nga pamjet e publikuara nga INA MEDIA, aty ka disa dhoma gjumi, një kuzhinë, një kuzhinë, një tualet, ambient ngrënie, pra komplet si një shtëpi normale. Ndërkohë, ajo mbikëqyret me kamera sigurie dhe dyert e saj janë të blinduara, ku nlse hyn, del vetëm me dëshirën tënde.

Nga pamjet lë të kuptohet se aty mund të kenë qëndruar dhe personazhe të krimit të shpallur në kërkim nga drejtësia apo Policia.

Ndaj 35-vjeçarit Suel Çela (Marjus Lulaj) vijon në fuqi një masë sigurie “Arrest me burg, në mungesë”, e vendosur nga Gjykata e Posaçme. Ndaj tij po zhvillohen hetime nga SPAK për grup të strukturuar kriminal, vrasje me paramendim, e mbetur në tentativë ndaj Lulzim Mashës, sigurim i kushteve dhe i mjeteve për të kryer vrasje në dëm të shtetasit Elton Kila.