Të paktën 51 të vdekur pas shpërthimit në një minierë qymyri në Iran

Të paktën 51 persona kanë vdekur dhe 20 janë plagosur pas një shpërthimi në një minierë qymyri në lindje të Iranit, raportojnë mediat iraniane.

Agjencia shtetërore iraniane tha se një rrjedhje metani shkaktoi shpërthimin në mbrëmjen e 21 shtatorit në minierën në Tabas, rreth 540 kilometra në juglindje të kryeqytetit, Teheran. Besohet se 44 minatorë janë ende të bllokuar brenda.

Rreth 70 njerëz ishin duke punuar në atë moment kur ndodhi shpërthimi.

Presidenti i ri reformist i Iranit, Masud Pezeshkian, i cili po përgatitej të udhëtonte për në Nju Jork për Asamblenë e Përgjithshme të OKB-së, tha se ka urdhëruar që të bëhen të gjitha përpjekjet për të shpëtuar të bllokuarit dhe për të ndihmuar familjet e tyre.

Ai gjithashtu njoftoi se ka nisur një hetim për incidentin.

Prokurori lokal, Ali Nesaei, cituar nga agjencia iraniane IRNA, tha se “akumulimi i gazit në minierë” e ka bërë të vështirë operacionin e kërkimit.

“Aktualisht, prioriteti është të ofrojmë ndihmë për të plagosurit dhe të nxjerrim njerëzit nga rrënojat”, tha Nesaei.

Ai shtoi se “neglizhenca dhe përgjegjësia e agjentëve përkatës do të trajtohen” më vonë.

Irani, një vend prodhues nafte, është gjithashtu i pasur me një sërë mineralesh. Irani konsumon rreth 3.5 milion ton qymyr në vit, por nxjerr vetëm rreth 1.8 milion ton nga minierat e tij. Pjesa tjetër importohet, shpesh për t’u përdorur në uzinat e çelikut të vendit.

Kjo nuk është fatkeqësia e parë që godet industrinë minerare të Iranit. Vitin e kaluar, një shpërthim në një minierë qymyri në qytetin verior Damghan vrau gjashtë persona, gjithashtu si pasojë e mundshme e një rrjedhje metani, sipas mediave lokale.

Në vitin 2013, 11 punëtorë humbën jetën në dy incidente të ndara minierash. Në vitin 2009, 20 punëtorë u vranë në disa incidente. Në vitin 2017, një shpërthim në një minierë qymyri vrau të paktën 42 persona.

Standardet e dobëta të sigurisë dhe shërbimet e pamjaftueshme emergjente në zonat minerare shpesh fajësohen për viktimat.