“E ringjallëm në ambulancë, situata ishte shumë serioze/ Mjeku tregon detajet çfarë ndodhi me Boven…

“Kanë kaluar 4 minuta nga momenti kur Bove ra në fushë, deri te vendosja e tij në ambulancë. Transporti nga stadiumi në spitalin ‘Careggi’ zgjati edhe 4 minuta të tjera. Ai hyri në dhomën e kuqe në ‘Careggi’ 13 minuta pas episodit. Po flasim për një problem që ne e përkufizojmë si ‘në varësi të kohës’. Nga ana jonë ka pasur organizim dhe jo improvizim.

Ndërhyrja e njerëzve që janë afër futbollistit në momente të tilla, shpesh cilësohet vendimtare, por Gini bëri të qartë se më mirë duhej që t’i hapej rruga ekspertëve, nëse të pranishmit nuk ishin të trajnuar.

“Duhet sqaruar kjo gjë. Padyshim që e vlerësojmë gjestin, por improvizimi nuk është zgjidhje. Manovra që u krye duke futur gishtat në gojën e Bove nuk këshillohet, për dy arsye. Si fillim duke qenë se pacienti mund të mbyllë papritur gojën, ai rrezikon të krijojë lëndime shumë të rënda në gishta. E dyta është se në atë moment mund të bëhen plagë brenda gojës, gjakderdhja e të cilave mund të jetë e vështirë për një pacient të asaj natyre. E përsëris, ne e vlerësojmë gjestin, por dua të nënvizoj rëndësinë e marrjes së kurseve të shpëtimit. Bëhet fjalë të ndjekësh disa orë kurse, por ato orë mund të shpëtojnë jetë”, tha ai.