Sekretari amerikan i shtetit Marco Rubio i premton Netanyahut mbështetje të palëkundur

Sekretari i ri i Shtetit, Marco Rubio, premtoi “mbështetje të palëkundur” për Izraelin gjatë një bisede telefonike me kryeministrin izraelit, Benjamin Netanyahu, njoftoi të mërkurën Departamenti i Shtetit. Rubio theksoi se mbështetja e SHBA-së për Izraelin është një prioritet kryesor për administratën e Presidentit Donald Trump, sipas një deklarate të zëdhënëses së Departamentit të Shtetit, Tammy Bruce.

Gjatë bisedës, Rubio përgëzoi Netanyahun për sukseset e Izraelit kundër Hamasit dhe Hezbollahut dhe shprehu angazhimin e tij për të ndihmuar në lirimin e pengjeve të mbajtura në Gaza.

Ndërkohë, Izraeli dhe grupi palestinez Hamas nisën zbatimin e një marrëveshjeje armëpushimi në Rripin e Gazës, pas më shumë se 15 muaj luftimesh. Marrëveshja përfshin shkëmbimin e pengjeve dhe të burgosurve izraelitë me të burgosur palestinezë. Kjo marrëveshje trefazore, e propozuar fillimisht nga ish-presidenti Joe Biden, u arrit pjesërisht falë përpjekjeve të përbashkëta të të dyja palëve dhe u zbatua në prag të inaugurimit të Presidentit Trump.

Megjithatë, Presidenti Trump, disa orë pas marrjes së detyrës, shprehu skepticizëm mbi zbatimin e armëpushimit. Në një nga vendimet e tij të para, ai hoqi sanksionet e vendosura nga paraardhësi i tij, Joe Biden, ndaj kolonëve ekstremistë izraelitë në Bregun Perëndimor, të cilët ishin ndëshkuar për sulmet ndaj palestinezëve.