LUFTA NE IRAN/ TRUMP NIS DHJETERA AVIONE NE IZRAEL

Shtetet e Bashkuara po përforcojnë praninë e tyre ushtarake në Izrael duke planifikuar dërgimin e dhjetëra avionëve shtesë për furnizim me karburant në ajër, raporton Axios, duke cituar tre zyrtarë amerikanë dhe izraelitë.

Sipas raportit, kjo lëvizje vjen në një periudhë kur presidenti amerikan Donald Trump po shqyrton plane të reja operacionale që parashikojnë zgjerimin e veprimeve ushtarake kundër Iranit, përtej operacioneve që janë në zhvillim në rajonin e Ngushticës së Hormuzit.

Burimet e cituara nga Axios thonë se ndër opsionet që po analizohen përfshihen sulme ndaj infrastrukturës kritike iraniane, si termocentralet, goditje të reja ndaj objekteve bërthamore me synimin për të shkatërruar rezervat e uraniumit të pasuruar të ruajtura në thellësi, si dhe bombardimi i objektit nëntokësor Pickaxe Mountain, i cili, sipas raportit, është ende në ndërtim.

Megjithëse presidenti Trump nuk ka marrë ende një vendim përfundimtar, zyrtarë amerikanë dhe izraelitë vlerësojnë se ai është i gatshëm të rrisë presionin ndaj Teheranit, me synimin për ta shtyrë Iranin të hapë Ngushticën e Hormuzit dhe të pranojë kërkesat amerikane lidhur me programin e tij bërthamor.

Sipas Axios, SHBA-ja ka aktualisht rreth 30 avionë furnizimi në ajër të vendosur në aeroportin Ben Gurion, pranë Tel Avivit, dhe rreth 30 të tjerë në aeroportin Ramon, në jug të Izraelit.

Sipas të njëjtave burime, ushtria amerikane preferon që këta avionë të operojnë nga aeroporti Ben Gurion, pasi bazat e tjera ajrore në rajon konsiderohen më të ekspozuara ndaj sulmeve të mundshme iraniane dhe më pak të sigurta për mjetet ajrore amerikane.

Zyrtarët izraelitë vlerësojnë se Teherani nuk planifikon aktualisht një sulm të drejtpërdrejtë ndaj Izraelit, pasi një veprim i tillë, sipas tyre, do të sillte kundërpërgjigje të gjera.

“Kam vetëm një mesazh për udhëheqësit e Iranit: Mos llogarisni se do të ketë qetësi nëse na sulmoni. Mos prisni që ngjarjet të përsëriten. Nuk do të jetë një përsëritje. Do të jetë diçka shumë më e fuqishme”, deklaroi të martën kryeministri izraelit Benjamin Netanyahu.

Sipas Axios, prania e dhjetëra avionëve amerikanë të furnizimit në ajër në aeroportin Ben Gurion është kthyer në një çështje politikisht të ndjeshme në Izrael.

Avionët, të cilët ndodhen prej muajsh në aeroport, kanë kufizuar ndjeshëm kapacitetin e tij operacional. Ndërsa hapësira ajrore izraelite po rikthehet gradualisht në funksionim dhe trafiku veror është rritur, vendosja e avionëve shtesë mund të shkaktojë anulime të shumta fluturimesh.

Çështja fiton peshë të veçantë politike edhe për shkak se zgjedhjet janë vetëm tre muaj larg. Ministrja izraelite e Transportit, Miri Regev, aleate e afërt e Netanyahut, ka kërkuar largimin e avionëve amerikanë nga aeroporti Ben Gurion ose të paktën uljen e numrit të tyre. Sipas Axios, kësaj kërkese i janë kundërvënë Ministria e Mbrojtjes dhe Forcat e Mbrojtjes së Izraelit.

Media amerikane shton se administrata Trump i ka kërkuar Izraelit të strehojë avionët shtesë të furnizimit në ajër, ndërsa vendimi përfundimtar pritet të merret nga kryeministri Benjamin Netanyahu.