Lufta në Ukrainë/ Putini forcon kushtet për paqe, nuk pranon më lëshime territoriale

Rusia nuk është më e gatshme të kthejë disa nga territoret e pushtuara në Ukrainë si pjesë e një marrëveshjeje për përfundimin e luftës dhe synon t’i mbajë ato si zona tampon përgjatë kufirit, raporton Bloomberg, duke cituar burime pranë Kremlinit.

Sipas tre personave të njohur me qëndrimin e Moskës, presidenti rus Vladimir Putin mbetet i vendosur të marrë nën kontroll të plotë rajonin lindor të Donetsk-ut përmes operacioneve ushtarake.

Në të njëjtën kohë, Rusia synon të mbajë edhe zonat e pushtuara në rajonet Sumy dhe Kharkiv, pranë kufirit rus, si pjesë e strategjisë së saj të sigurisë.

Burimet thonë se Putini ka hequr dorë nga ideja e lëshimeve territoriale, pasi Kremlini i interpreton deklaratat gjithnjë e më të ashpra të administratës amerikane si dëshmi se mirëkuptimet jozyrtare të arritura gjatë samitit me presidentin e Shteteve të Bashkuara, Donald Trump, në Alaska, nuk ekzistojnë më.

Megjithëse Washingtoni ka këmbëngulur se në samitin e zhvilluar në gusht të vitit të kaluar nuk u arrit asnjë marrëveshje për përfundimin e luftës, zyrtarë rusë kanë folur vazhdimisht për atë që e quajnë “fryma e Anchorage-it”, një paketë mirëkuptimesh joformale mes Putinit dhe Trumpit.

Sipas këtyre burimeve, një nga elementët e diskutuar kishte qenë dorëzimi nga Ukraina i territoreve në Donetsk, në këmbim të tërheqjes së Rusisë nga pjesë të rajoneve Sumy dhe Kharkiv.

Qëndrimi i Kremlinit është ashpërsuar edhe pas intensifikimit të sulmeve ukrainase në thellësi të territorit rus, përfshirë Moskën, të cilat kanë dëmtuar rafineritë e naftës dhe kanë shkaktuar mungesa karburanti në disa zona të vendit.

Në të njëjtën kohë, presidenti Trump ka mbështetur një projektligj për sanksione të reja ndaj Rusisë, i cili parashikon tarifa deri në 100% ndaj pesë blerësve më të mëdhenj të naftës dhe gazit rus.

Negociatat e ndërmjetësuara nga Shtetet e Bashkuara mes Rusisë dhe Ukrainës kanë mbetur në vend që prej muajit shkurt, ndërsa administrata amerikane e zhvendosi vëmendjen te konflikti me Iranin.