Braçe shpërthen pas videos me para te Dinamo: Kjo është të lësh nam

Pamjet e festës së Dinamos pas fitores 4-0 ndaj Auda-s dhe kualifikimit në “play-off”-in e Conference League kanë kaluar kufijtë e sportit dhe kanë hapur një debat publik për mënyrën se si qarkullojnë dhe deklarohen paratë në futbollin shqiptar.

Në videon që është bërë virale, presidenti i Dinamos, Adrian Bardhi, shfaqet në dhomat e zhveshjes me lojtarët, duke hapur një qese me para gjatë festimeve.

Deputeti socialist Erion Braçe ka reaguar ashpër, duke e konsideruar skenën dëmtuese për imazhin e futbollit shqiptar.

“KJO ËSHTË TË LËSH NAM NGA SHQIPËRIA NË ARGJENTINË”, shkruan Braçe, duke e lidhur episodin drejtpërdrejt me debatin për financimin dhe sponsorizimin e sportit.

Braçe thotë se kishte ndryshuar qëndrim dhe kishte propozuar një ligj që do të krijonte më shumë mundësi për sponsorizimin e sportit, por me një kusht të qartë: PARATË TË KALONIN NË RRUGË TË LIGJSHME, TË DOKUMENTUARA DHE TË PASQYRUARA NË BILANCE.

Sipas deputetit, pas publikimit të këtyre pamjeve do ta ketë edhe më të vështirë të bindë ministrin e Financave për një skemë më të favorshme sponsorizimi.

Braçe i drejton gjithashtu një pyetje publike FSHF-së për mënyrën se si kontrollohen financat e klubeve dhe zbatohen rregullat e “Financial Fair Play”.

DUHET THEKSUAR SE PAMJET NUK PROVOJNË SE PARATË E SHFAQURA JANË TË PADEKLARUARA APO TË PALIGJSHME. Çdo interpretim i tillë, pa dokumente apo hetim zyrtar, mbetet në nivelin e dyshimeve dhe pyetjeve të ngritura publikisht.

Por videoja ka rikthyer një debat që shkon përtej një feste në dhomat e zhveshjes:

SA TRANSPARENTE JANË FINANCAT E KLUBEVE SHQIPTARE DHE A MUND TË KËRKOJË FUTBOLLI MË SHUMË PARA NGA BIZNESI E SHTETI PA GARANTUAR MË PARË TRANSPARENCË TË PLOTË?