PROTESTA SOT/ POLICIA HEDH GAZ LOTSJELLES

Tensione dhe përplasje në tubimin para Kuvendit, ndërsa pritet të nisë edhe seanca plenare. Ndryshe nga herët e tjera, Policia e Shtetit kishte vendosur një perimetër të zgjeruar sigurie, që shtrihej nga Rruga e Elbasanit deri te Ministria e Brendshme, duke mbajtur protestuesit disa qindra metra larg hyrjeve të Parlamentit. Deputetët arritën të futen në Kuvend pa qenë shënjestër e sulmeve, kryesisht nga hyrja anësore pranë Pedonales, ndërsa u pritën vetëm me thirrje si “Deputetë frikacakë”, “Nuk na përfaqësoni”, “Parlament i krimit”, “Poshtë qeveria”, “Ju erdhi fundi” dhe “Shqipëria kërkon revolucion”. Të gjendur përballë kësaj situate protestuesit arsenalin me vezë e domate e zbrazën në drejtim të efektivëve të policisë. Momenti më i tensionuar u regjistrua pranë hyrjes kryesore të qendrës tregtare “Toptani”, ku pasi policia lejoi kalimin e një gruaje me të afërmin e saj me aftësi të kufizuara, protestuesit tentuan të shfrytëzonin hapësirën për të çarë kordonin. Ata arritën të heqin një pjesë të gardhit metalik, duke u përplasur me efektivët dhe duke i goditur me vezë e domate. 3 efektivë mbetën të lënduar, njër prej tyre me dëmtime në kokë.
Mes thirrjeve “polici e krimit” dhe “revolucion” protestuesit bllokuan për pak minuta rrugën e Elbasanit. Përplasjet me efektivët vijuan dhe rreth orës 09:40, policia u kundërpërgjigj me ujë e gaz lotsjellës për shpërndarjen e turmës.