“Investim apo marrëveshje e fshehtë?” Skënder Dika ngre pikëpyetjet që po ndezin debatin për Sazanin

Debati mbi investimin e parashikuar në ishullin e Sazanit dhe zonën e Zvërnecit vijon të mbetet në qendër të vëmendjes publike. I ftuar në emisionin “Tik Talk” në NTV, publicisti Skënder Dika ngriti pikëpyetje të rëndësishme lidhur me transparencën e procesit dhe mënyrën se si po prezantohet projekti para qytetarëve.

Gjatë intervistës, moderatorja Grisela Zendeli iu referua reagimit të tij të fundit në rrjetet sociale, ku ai e kishte cilësuar projektin si një “aferë të shëmtuar”, duke e pyetur se cili është elementi konkret që e bind se bëhet fjalë për një aferë dhe jo thjesht për një investim të huaj.

Në përgjigjen e tij, Dika u shpreh se pikërisht dallimi ndërmjet një investimi serioz dhe një marrëveshjeje të paqartë përbën thelbin e debatit që po zhvillohet aktualisht në Shqipëri.

Sipas tij, një pjesë e analistëve dhe aktorëve publikë po përpiqen ta kufizojnë diskutimin vetëm te përfitimet ekonomike që mund të sjellë një investim i huaj, ndërkohë që po anashkalohen çështjet që lidhen me transparencën, procedurat dhe interesin publik.

“Diferenca mes një investimi të huaj dhe një afere të fshehtë politike është thelbësore. Pikërisht kjo është arsyeja pse është krijuar kaq shumë debat dhe tension në opinionin publik”, deklaroi Dika.

Ai theksoi se, sipas vlerësimit të tij, media dhe opinioni publik duhet të përqendrohen te transparenca e procesit dhe jo vetëm te vlera financiare e investimit, duke shtuar se qytetarët kanë të drejtë të informohen mbi mënyrën se si po merren vendimet për zona që konsiderohen me rëndësi strategjike dhe turistike për vendin.

Deklaratat e tij vijnë në një moment kur protestat kundër projektit në Zvërnec kanë rikthyer në qendër të diskutimit publik çështjen e administrimit të pasurive natyrore dhe transparencës në marrëdhëniet ndërmjet qeverisë dhe investitorëve të huaj.