Shkullaku: Policia dhunë pa bërë asgjë opozita, Berishën e godasin me ujë pa mbaruar fjalimin

Armand Shkullaku u shpreh se, situata politike në vend është përkeqësuar ndjeshëm, duke akuzuar policinë për ushtrim dhune ndaj opozitës, edhe në mungesë të reagimeve agresive nga ana e saj.

Sipas tij, ndryshe nga disa vite më parë kur protestat e opozitës ishin më të ashpra dhe përfshinin bllokime rrugësh dhe përplasje para institucioneve, sot policia ndërhyn me forcë edhe kur opozita nuk kryen veprime të dhunshme.

Ai përmend si shembull incidentin ku, sipas tij, kreu i opozitës, Sali Berisha, është goditur me ujë pa përfunduar fjalimin. Sipas tij,  qytetarët nën këtë regjim, dekurajohen të protestojnë.

Shkullaku deklaroi se, hapësirat demokratike janë ngushtuar ndjeshëm dhe se opozita e ka të pamundur të sjellë ndryshim përmes mekanizmave aktualë. Ai thekson se parlamenti, ka humbur funksionin, duke përmendur përjashtimet e shumta të deputetëve të opozitës gjatë viteve të fundit dhe mungesën e pasojave për mazhorancën.

‘Veprimet e policisë sot, pra në qoftë se shtatë tetë vite më parë militantët e opozitës ishin shumë më tepër agresivë, para parlamentit, para kryeministrisë, bllokim rrugësh e tjerë e tjerë, sot policia ushtron dhunë pa bërë asgjë opozita.

Pa mbaruar fjalimin Sali Berisha goditet me ujë. 82 vjeç sa është, e shohin në rrugë, e rrethojnë, e godasin, e mbrojnë njerëzit me çadra, një figurë që sido që të jetë përfaqëson opozitën.

Pra, kur ka regjime nuk mund të presësh që të shtohen qytetarët në rrugë. Unë jam habitur dhe e kam thënë dhe këtu që dhe zgjedhjet e kaluara u habita që morën 500.000 vota. Si mund të marrë 500.000 vota se kjo polici që është aty është e njëjta polici që vjedh zgjedhjet.

Këta policë që, këta që drejtojnë policinë sot janë ata që i vinin GPS-a dhe përgjues drejtuesve të Partisë Demokratike në zgjedhje. Kjo është policia që tërheq zvarrë ish-kryeministrin dhe ish-presidentin e vendit, për të tmerruar ata pak votues që i kishin ngelur opozitës.

Nga 180.000 përfundoi me 20.000 Lëvizja Socialiste për Integrim. Kjo është policia e regjimit që nuk e ka bërë asnjë nga vendet ku flasim ne, që praktikisht, de facto, partinë kryesore të opozitës e nxori jashtë ligjit. E nxori jashtë ligjit.

Partia kryesore e opozitës, ka hyrë në zgjedhje me, pa komisionerë, pa vëzhgues, pa fonde nga KQZ-ja, pa kohë televizive dhe pa të patur të drejtën të ketë emrin në fletën e votimit. Këto nuk kanë ndodhur në vend tjetër. I ke të gjithë liderët e opozitës në procese penale. I ke, si do të zgjohet shoqëria kur nuk ke shoqëri civile njëherë. Si do zgjohen qytetarët të shkojmë?

Ti e ke një pushtet që te ushtron dhunë dhe intensifikon dhunën sepse atë mënyrë njeh dhe nga ana tjetër, paratë e krimit i përdor për të blerë çdo lloj kundërshtari politik.

Si mund të ngresh mediat qytetare kur asnjë nga mediat më të mëdha nuk bën thirrje njerëzve që të dalin në rrugë të protestojnë, qoftë dhe për çmimin e karburantit. Pra në një shoqëri ku çdo liri dhe çdo hapësirë është e kufizuar, është e kotë të diskutojmë që ore shiko, se s’jam dakord me ata që këta bëjnë sikur dhe këta bëjnë sikur. Jo mo jo, Edi Rama nuk bën sikur.

Edi Rama nuk do më asnjë njeri që ta shqetësojë, qoftë opozitë, qoftë qytetar i lirë, qoftë brenda Partisë Socialiste, qoftë në SPAK, qoftë në BKH, qoftë në gjykatë. Nuk duron dot më, nuk do më. Dhe çdo hapësirë sa vjen edhe ngushtohet.

Dhe ne kërkojmë një paradoks që nuk e di se pse nga e shpikin, që ndërkohë që të gjitha këto liri ngushtohen dhe asgjësohen, ne duam që qytetarët në rrugë të shtohen. Unë këtë nuk e di. Shiko, marrim dhe shembullin e 35 viteve të fundit të pluralizmit. Kanë dalë njerëzit në rrugë, kanë protestuar njerëzit sepse ka patur rezultat protesta, ka prodhuar rotacion, kampet politike kanë qenë të ndara, media e madhe ka qenë e ndarë, një këtej, një andej, ëh shoqëria civile ka qenë aktive.

Pra ka qenë një shoqëri shumë më demokratike sesa kjo që kemi sot. Sot e kemi ngelur pesë, gjashtë njerëz që i diskutojmë akoma këto probleme sikur këto, këtu të ketë mbetur ndonjë pak oksigjen. Këtu është asfiksuar çdo liri dhe, në qoftë se ka një vlerë këto protesta të opozitës, sado ashtu siç janë, edhe me pesë njerëz dhe me ato goditje që marrin, është për ta bindur përfundimisht edhe shoqërinë, po edhe vetë opozitën që nuk mundet të bëjë ndryshim me një regjim që nuk ka lejuar asnjë liri. Ose unë e kam thënë dhe herë tjetër, ose duhet, se e kanë provuar.

Parlamenti është kot. Ti shkon në parlament, komisione parlamentare, thotë s’ke të drejtë të bësh. Kryeministri nuk shkel fare, mocionet i shpërfill, interpelancat i shpërfill, të gjitha të drejtat t’i fshinë, domethënë është në të gjithë, sa u bënë pesë vitet e fundit, jo më vetëm

sesionin e kaluar deputetët e opozitës janë përjashtuar 362 ditë nga Kuvendi.

Deputetët e Partisë Socialiste asnjë ditë.

Pra parlamenti është kot.’, u shpreh Armand Shkullaku