Ministrja e Shtetit për Marrëdhëniet me Parlamentin, Elisa Spiropali ka reaguar ndaj sulmeve që ka bërë Ilir Meta ndaj SPAK dhe Altin Dumanit. Spiropiali i kërkoi opozitës që të dalë e të thonë para Kuvendit se çfarë mendimi kanë për SPAK, është organizatë kriminale siç e quajnë dy baballarët e tyre (Meta e Berisha) apo institucion i drejtësisë.

“Ju që keni opinion për gjithçka dhe gjithëkënd, a keni ju një opinion për dy baballarët në majë të thanës ku jeni ngjitur të tërë. Njëri në majë të pallatit që bërtet kundër SPAK dhe tjetri në majën e dëlirit të madhështisë ku kafshon SPAK dhe kreun e SPAK nëpër ekrane e ku t’i dalë para. A keni ju një opinion për këto, meqë keni opinione për gjithçka, bëni prokurorin e gjyqtarin. Gjuhën e dalë nga binarët e mendjes së dy baballarëve në majë të thanës ju as nuk e përmendi, të dy presidentë të kësaj republike, dy kryeministra, të dy bela të këtij populli. Ju nuk mund as të shpreheni dhe vini këtu e doni të bëni sherr e rrëmujë dhe të na thoni njëherë e mire ca opinioni keni për ulërimat e tyre. Nuk janë dy kokë dele, por janë dy baballarët e opozitë suaj në emër të cilëve vini këtu e na drejtoni gishtin për drejtësinë, ju që jeni të zhytur kokë e këmbe, vetëm dy gishta jashtë. Ju mendoni se mund të hani thana në pemët e tyre dhe vilni votat në koshin e popullit. Duke i mbajtur të dy ata mbi supe siç mbanin shërbëtorët njëherë e një kohë mbretërit në ato karroca, vini këtu të mbani peng këtë kuvend me hallin e madh që ka gjet ata dy. Çohuni thoni qartë ca është SPAK organizatë kriminale, apo pjesë e institucioneve të reja të drejtësisë që po luftojnë pandëshkueshmërinë. Përgjigjja mos të jetë si hera e kaluar se kur SPAK godet Ramën është institucionet e drejtësisë e kur godet baballarët tuaj është organizatë kriminale”, tha Spiropali.

Lulzim Basha nga foltorja e Kuvendit kërkoi të hyjë në seancë plenare debati për amendamentin në buxhet për ndihmën ndaj Kosovës që prej muajsh mbahet në sirtar sipas tij

Basha: Qytetarët e dinë se ju prej 6 muajsh në mjegullën e ish revolucion rahmet pastë keni bllokuar dhjetëra iniciativa nga opozita. Ku e keni interpelancën e kërkuar nga PD për kampet e refugjatëve. Ku e keni interpelancën e kërkuar për Arben Ahmetaj. Ka 4 muaj që mbani në sirtar amendamentin për Kosovën. Ka nevojë të votohet amendamenti. E keni kthyer në bunker konferencën e kryetarëve. Pres përgjigje. Çfarë keni bërë me vettingun e politikanëve.

Felaj: Do flisni për seancën e sotme

Basha: Skam mbaruar. S’kam mbaruar. Ku e keni projekt vendimin për heqjen e imunitetit të deputetëve. Ku i keni këto akte. Dy interpelanca me kryeminstrin. Amendamenti 50 milionë euro për buxhetin e Kosovës. Projekt vendimi për heqjen e imunitetit të parlamentarëve. Pres përgjigje, pse nuk vijnë në seancë.

Nikoll Lesi shkruan në gazetën e tij, se Ilir Meta e kaloi vijën e kuqe me sulmet ndaj SPAK.

“SPAK mori dje mbështetje totale nga ambasada amerikane dhe ambasada britanike. Dhe nga ambasadat e tjera. Sepse Ilir Meta ka sulmuar egër shefin e SPAK, Altin Dumani.

Statura e një ish-presidenti, ish-kryeparlamentari dhe ish-kryeministri nuk ia lejonte kurrsesi një fjalor të tillë denigrues dhe fyes ndaj Altin Dumanit. Ndaj askujt dhe aq me tepër ndaj atij që po heton nuk lejohet ky fjalor.

Ilir Meta mund të ketë gjithë të drejtën e Zotit të kritikojë apo sulmojë me fakte dhe argumenta, nëse i ka, se Altin Dumani po përdoret politikisht apo nga nderkombetarët, por në asnjë mënyrë me sharje të tilla sepse i bëjnë dëm vetë Ilir Metës.

Si një reagim direkt kundër Ilir Metes ishin dy deklaratat e dy Ambasadave më të fuqishme në Tirane, ajo amerikane dhe ajo britanike.

“Përshëndesim dënimin nga KLP të sulmeve të drejtpërdrejta dhe të tërthorta kundër SPAK-ut në ditët dhe javët e fundit. Do të vazhdojmë të qëndrojmë në krah të shumicës dërrmuese të qytetarëve shqiptarë që mbështesin institucionet e reja të drejtësisë dhe rolin kyç që ato luajnë në demokracinë e Shqipërisë.

SHBA qëndron në krah të profesionistëve të drejtësisë që respektojnë ligjin dhe do të mbështesë të gjithë ata që kërkojnë t’i japin fund pandëshkueshmërisë”, thuhet në reagimin e ambasadës së SHBA-ve.

Ndërsa Ambasada e Britanise se Madhe ishte me konkrete, direkt sapo Ilir Meta sulmoi Altin Dumanin.

Me sa duket do të kemi re të zeza mbi selinë e Partise së Lirisë, ndonëse rrufetë duhet të bien edhe diku tjetër në PS!

Dje Ilir Meta kaloi çdo vijë të kuqe dhe çdo limit që duhet të ketë një politikan karriere. Altin Dumani mbetet më i votuari nga publiku shqiptar dhe ka mbështetje popullore bashkë me prokurorët e SPAK”, shkruan ai.

Kreu i PD Lulzim Basha ka folur para seancës plenare të ditës së sotme për kallëzimin që ka bërë në SPAK ndaj Lindita Nikollës për shpërdorim detyre. Basha tha se Nikolla ka zhbërë vendimet që janë marrë nga drejtuesit e PD, duke njohur Bardhin si kreun e grupit, i cili ktheu edhe deputetët e përjashtuar.

Ky është një pazar tha Basha mes Rithemelimit dhe PS, ku për të futur deputetët në grupin e PD nuk çuan Olta Xhaçkën në Kushtetuese.

“Kjo është pjesë e lojërave politike, teatrit që bëhet në kurriz të shqiptarëve. Kanë 5 muaj që gjoja bllokojnë Kuvendin, kalon buxheti me 3 minuta,, vendime të rëndësishme dhe pastaj bëhen bashkë për një amnisti që liron të korruptuarit, pro jo protestuesit. Pakti vazhdon, nga njëra anë duan t’i imponohen PD. PD ka marrë vendime që qëndrojnë në themel të identitetit tonë politik, partneriteti me SHBA dhe drejtësinë. Rama përdor këtë pazarxhinj për t’iu bërë një nder atyre dhe merr nderin tjetër që është qëndrimi i Olta Xhaçkës, qëndrim totalisht i rakorduar. Kushtetuesja u shpreh, nuk votoi parlamenti, ngrihu blloko foltoren. Ta bllokojnë këta pazarxhinjtë. Bubat e Lindita Nikollës mashtrojnë opinionin. Jo çdo bub kur leh e ka me të keq, leh edhe se do të hajë. Të çohen e të bllokojnë foltoren, se me vendimin për Olta Xhaçkën jemi më krizë kushtetuese. Këta bëjnë sikur s’ka ndodh asgjë, sepse e kanë ngrënë lugën e çorbës së prishur”, tha Basha.