Tryeza e dorëzimit/ Irani drejt negociatave me Amerikën, merr OK nga Mojtaba Khamenei

Iran ka pranuar në parim të hyjë në negociata me SHBA-të për të zgjidhur përshkallëzimin e fundit të konfliktit, raportojnë burime për Axios.
Sipas raportimit, vendimi është marrë në momentet e fundit nga lideri Suprem, Ajatollah Mojtaba Khamenei, pas presionit të fortë nga Garda Revolucionare e Islamike, i cili kishte shtyrë për një qëndrim më të ashpër ndaj Washingtonit.
Në të njëjtën kohë, zv.presidenti amerikan JD Vance pritet të mbërrijë së shpejti drejt Islamabad, ku do të zhvillohen kontaktet diplomatike.
Megjithatë, mbetet e paqartë nëse Irani do të dërgojë një delegacion zyrtar dhe në çfarë niveli do të përfaqësohet në bisedime, edhe pse besohet se Mohammad-Bagher Ghalibaf, kreu i Parlamentit, do të jetë në krye të palës iraniane.
Zëvendëspresidenti i Shteteve të Bashkuara të Amerikës, JD Vance, pritet të udhëtojë drejt Islamabadit për të udhëhequr një delegacion diplomatik amerikan, nëse Irani bie dakord për zhvillimin e një raundi të ri bisedimesh, ndërsa afati i armëpushimit aktual po afrohet drejt fundit.
JD Vance pritet të udhëheqë delegacionin amerikan në Pakistan nëse Irani pranon bisedimet
Sipas burimeve, Vance do të shoqërohet nga i dërguari special i presidentit Donald Trump, Steve Witkoff, si dhe Jared Kushner. Megjithatë, presidenti iranian Masoud Pezeshkian ka paralajmëruar se ekziston një “mosbesim i thellë historik” ndaj SHBA-së, duke kritikuar sinjalet “kontradiktore” nga zyrtarët amerikanë dhe duke i cilësuar ato si përpjekje për dorëzim.
Nga ana tjetër, një zyrtar i lartë iranian ka bërë të ditur se Irani po e shqyrton “pozitivisht” pjesëmarrjen në bisedime. Raportohet se delegacioni iranian mund të drejtohet sërish nga kryetari i parlamentit Mohammad Bagher Ghalibaf, nëse Vance merr pjesë.
Ghalibaf deklaroi se Irani nuk do të pranojë negociata “nën kërcënim”, duke shtuar se vendi është i përgatitur të “zbulojë karta të reja në fushëbetejë”. Ai gjithashtu akuzoi Trump për përpjekje për ta kthyer tryezën e negociatave në një “tryezë dorëzimi”.
Ndërkohë, Teherani ka kërkuar heqjen e bllokadës amerikane në Ngushticën e Hormuzit, ndërsa Trump ka përsëritur kërkesën që Iranit të mos i lejohet kurrë zhvillimi i armëve bërthamore, duke lënë të hapur edhe mundësinë e një takimi të drejtpërdrejtë me liderët iranianë.
Fillimisht, Trump kishte deklaruar se delegacioni amerikan ishte nisur tashmë, por zyrtarët amerikanë sqaruan më vonë se udhëtimi i Vance pritet të ndodhë të martën në mëngjes, nëse bisedimet konfirmohen.
Një raund i dytë bisedimesh, me rëndësi të lartë për përfundimin e konfliktit të nisur nga bombardimet amerikane dhe izraelite në fund të shkurtit, mund të zhvillohet të mërkurën. Megjithatë, rreziku i rifillimit të luftimeve mbetet i lartë.
Trump deklaroi se armëpushimi dyjavor me Iranin përfundon të mërkurën në mbrëmje sipas orës së Washingtonit dhe shtoi se është “shumë e pamundur” që ai të zgjatet më tej, duke lënë të kuptohet se bombardimet mund të rifillojnë.
Bisedimet e mëparshme mes palëve dështuan pasi Irani refuzoi të ndalonte pasurimin bërthamor dhe të dorëzonte rezervat e uraniumit të pasuruar, ndërsa kërkoi garanci se nuk do të sulmohej sërish.
Ndërkohë, Pakistani ka ndërmarrë masa të forta sigurie në kryeqytet, duke kufizuar transportin publik dhe duke përgatitur infrastrukturën për pritjen e negociatave. Kriza energjetike është thelluar, pasi mungesat e naftës dhe gazit janë përkeqësuar nga bllokadat në Ngushticën e Hormuzit.
Tensionet janë rritur edhe më tej pasi ushtria amerikane sekuestroi një anije me flamur iranian që tentoi të kalonte bllokadën, ndërsa incidente të tjera detare kanë ndikuar në rritjen e çmimit të naftës në tregjet ndërkombëtare.
Në një zhvillim paralel, Izraeli dhe Libani pritet të zhvillojnë një raund të dytë bisedimesh në Washington të enjten, ndërsa situata në jug të Libanit mbetet e tensionuar, me paralajmërime për civilët që të shmangin zonat pranë kufirit.
E ardhmja e negociatave dhe stabiliteti në rajon mbeten të pasigurta, ndërsa ora po numëron përfundimin e armëpushimit.