Sulmi me thikë në Francë/Macron viziton fëmijët e plagosur

Presidenti francez Emmanuel Macron tha se ka dëgjuar lajme “pozitive” për gjendjen e fëmijëve, të cilët ishin viktima të sulmit me thikë të së enjtes në Annecy. Macron po vizitonte qytetin ku u sulmuan katër fëmijë. Ai tha se një vajzë e re britanike ishte “zgjuar” pas operacionit. Një foshnje holandeze gjithashtu thuhet se po shërohet. I dyshuari, një burrë sirian me status refugjati në Suedi, mbetet në paraburgim dhe do t’i nënshtrohet një vlerësimi psikiatrik.

31-vjeçari mendohet se ka jetuar i pastrehë në Annecy, dhe së fundmi iu refuzua kërkesa për azil. Ngjarja nuk dyshohet për motive terroriste. Katër fëmijë gjithsej, të moshave nga 22 deri në 36 muaj, dhe dy pensionistë u plagosën gjatë sulmit.

Në një fjalim, Macron tha se sulmi ndaj fëmijëve ishte “veprimi më barbar”. Ai vizitoi një spital lokal, ku takoi një burrë që u godit me thikë nga 31-vjeçari. Ai u takua gjithashtu me Henrin, të ashtëquajturin “heroi i shpinës” i cili përdori çantën e shpinës për të ndaluar sulmuesin. Macron tha se vajza e re britanike që u sulmua dhe iu nënshtrua operacionit ishte “zgjuar”.

“Ajo po shikon TV dhe [sulmi] është vetëm një kujtim i keq tashmë”, tha ai, sipas agjencisë së lajmeve AFP.

“Mjekët janë optimistë”, tha presidenti, duke shtuar se ende kërkohet kujdes, raporton “BBC”.  Ministri i Jashtëm holandez Ëopke Hoekstra tha se ishte “i lehtësuar” kur dëgjoi se vajza holandeze që ishte viktimë e sulmit “është jashtë rrezikut”.

Prokurorët po punojnë për zbardhjen e motivit të sulmit. Autori mendohet se ka jetuar si i pastrehë në Annecy që nga vjeshta e kaluar, pasi la ish-gruan dhe djalin tre vjeçar në Suedi. Ministri i Brendshëm i Francës thotë se kërkesa e tij për azil në Francë u refuzua disa ditë më parë.