Onana drejtë largimit nga Inter

Andre Onana do të largohet nga Interi për t’u transferuar te Manchester United. Në pritje të njoftimit zyrtar që do të arrijë vetëm pasi të jenë zbardhur detajet e fundit, rezultati i negociatave duket se është në favor të anglezve.

Portieri kamerunas do të jetë gardiani i ri i “Djajve të Kuq” dhe Interi do të përfitojë 55 milionë euro duke përfshirë edhe bonuset. Ditën e djeshme Interi refuzoi 50 milionë euro për Onana nga Manchester United dhe tashmë të gjithë janë të sigurt se shifra përfundimtare që do të ofrojnë anglezët do të jetë 55 milionë dhe kështu Inter do të pranojë ofertën.

Pas një sezoni të vetëm me Interin, me një performancë të jashtëzakonshme, sidomos në Champions League ku spikati si portieri i turneut, Andre Onana do të largohet nga zikaltërit si një i sakrifikuar. Një pjesë e konsiderueshme e fitimit prej kartonit të kamerunasit do të shkojnë për të investuar te transferimi përfundimtar i Romelu Lukakut nga Chelsea.