TRONDITET BRUNO FERNANDES! HAJDUTËT HYJNË NË SHTËPINË E YLLIT TË UNITED GJATË NDESHJES SË CHAMPIONS LEAGUE

Një natë e keqe në fushë është shndërruar në një makth edhe jashtë saj për kapitenin e Manchester United, Bruno Fernandes. Ndërsa portugezi ndodhej në Itali për ndeshjen e Champions League, persona të paidentifikuar hynë në banesën e tij në Angli.

Ngjarja ndodhi mbrëmjen e 21 tetorit, gjatë përballjes së Manchester United me Comon, ndeshje që skuadra angleze e humbi me rezultatin e rëndë 4-1.

Sipas raportimeve të mediave britanike, autorët shfrytëzuan mungesën e futbollistit për të hyrë në pronën e tij në Cheshire.

Familjarët e Fernandes nuk ndodheshin në banesë në momentin e ngjarjes. Raportohet se autorët qëndruan brenda për më pak se pesë minuta dhe u larguan përpara mbërritjes së policisë.

Autoritetet kanë nisur hetimet për të identifikuar personat përgjegjës, ndërsa Manchester United po i ofron mbështetje kapitenit të skuadrës.

Ngjarja rikthen shqetësimin për sigurinë e futbollistëve të njohur në Angli. Në të kaluarën, edhe emra të tjerë të Premier League, përfshirë Jack Grealish, Raheem Sterling dhe Riyad Mahrez, janë përballur me incidente të ngjashme.

Për Bruno Fernandes, goditja vjen në një moment tepër të vështirë profesional. Manchester United po kalon një periudhë rezultatesh zhgënjyese, ndërsa kapiteni është vendosur në qendër të debatit për kritikat ndaj mënyrës si skuadra po drejtohet.

Megjithatë, ajo që ndodhi jashtë fushës është një çështje krejtësisht tjetër: siguria e familjes dhe privatësia e një sportisti.

Hetimi do të duhet të sqarojë kush qëndron pas vjedhjes dhe nëse autorët e kishin planifikuar ngjarjen duke njohur angazhimin e futbollistit në Itali. Deri tani, një lidhje e tillë nuk është konfirmuar nga autoritetet.

ntv.al