Kosova vazhdon rrugën drejt integrimit në NATO/ Sveçla: Kërcënimet e Serbisë përbëjnë problem serioz

Ministri i Brendshëm, Xhelal Sveçla ka pritur në takim Shefen e Operacioneve aktuale, nga Divizioni për Operacione i Shtabit të Përgjithshëm të NATO-s, Ariella Viehe.

Sveçla theksoi se ka biseduar me Viehen për situatën aktuale të sigurisë në Kosovë, veçanërisht në veriun e Kosovës.

“Sulmet e njëpasnjëshme të viteve të fundit ndaj institucioneve tona dhe zyrtarëve tanë në veriun e Kosovës si dhe sulmi terrorist i 24 shtatorit ishin çështjet e rëndësishme për të cilat biseduam me znj. Viehe, po ashtu edhe për bashkëpunimin dhe bashkëveprimin e mirë e të vazhdueshëm mes KFOR dhe Policisë së Kosovës”, shkroi Sveçla.

Ai theksoi se ranë dakord për bashkëpunim të mëtejshëm.

“Kërcënimet e vazhdueshme të Serbisë dhe ambiciet e saj territoriale për Kosovën vazhdojnë të përbëjnë problem serioz për Kosovën por edhe të rajonit”.

Sveçla gjithashtu pohoi se Kosova aspiron rrugën drejt integrimit në NATO dhe në këtë kuptim, do të vazhdojnë përpjekjet si partner serioz në garantimin e sigurisë në vend dhe në rajon.