A do të ketë sulme të tjera drejt Izraelit? Ja si përgjigjet gjenerali iranian

Irani nuk ka ndërmend të vazhdojë operacionin e tij ushtarak kundër Izraelit, i cili përfshinte sulme masive me dronë dhe raketa gjatë fundjavës, ka thënë shefi i shtabit të Forcave të Armatosura, gjeneralmajor Mohammad Bagheri.

Të shtunën mbrëma, Teherani nisi një breshëri prej 300 raketash dhe dronësh kamikazë ndaj shtetit hebre.

Sulmi erdhi si hakmarrje për atë që Irani pretendon të jetë një sulm ajror izraelit në konsullatën e Teheranit në Damask, Siri në fillim të këtij muaji, ku midis 16 viktimave ishin disa oficerë të lartë ushtarakë iranianë.

Duke folur pas sulmit të së dielës, Bagheri shpjegoi se arsyeja e sulmit ishte pasi “regjimi sionist kaloi vijën e kuqe” në një mënyrë që nuk mund të tolerohet. Veprimet e Izraelit, vazhdoi gjenerali, nuk mund të mbesin pa përgjigje. “Udhëheqësi suprem tha gjithashtu se ky dënim duhet të kryhet dhe falë Zotit, ky operacion u krye me përpjekjet e Gardës Revolucionare [Islamike] dhe me ndihmën e forcave të tjera të armatosura.

Shefi i Shtabit të Përgjithshëm shtoi se ushtria iraniane shënjestroi një “qendër të madhe informacioni” që ofronte informacione për Izraelin dhe bazën ajrore Nevatim, e cila tha se priste avionë luftarakë F-35 të projektuar nga SHBA, të përfshirë në bastisjen në konsullatën në Damask.