Stuhi shiu dhe ere “godasin” Shqipërinë, rrëzohen pemët në Tiranë, përmbytje në Lezhë

Pas ditëve të nxehta të gushtit stuhi shiu dhe ere kanë pushtuar gjithë vendin. Në zona të ndryshme të kryeqytetit janë rrëzuar një numër i konsiderueshëm pemësh për shkak të erës së fortë, si më problematike paraqiten zonat: Shkolla e Bashkuar, Ish- stacioni i trenit, apo zona e Oxhakut.

Pamje nga Tirana

Qyteti bregdetar i Vlorës fillimisht është goditur nga një stuhi rëre që ka mbuluar qytetin, duke krijuar vështirësi për qytetarët dhe një trafik të rënduar në disa akse për shkak të largimit të pushuesve. Dhe më pas nga reshje shiu të cilat kanë përmbytur edhe rrugët.

Po ashtu edhe Fieri është përballur me trafik të rënduar për shkak të reshjeve të dendura të shiut që kanë nisur mesditën e sotme.

Në Lezhë situata paraqitet më e rënduar me përmbytje në disa rrugë të qytetit, niveli ujit ka arritur në 30 cm, duke bllokuar hyrjet e pallateve dhe duke e bërë të vështirë lëvizjen si për automjetet dhe për këmbësorët. Në zonën turistike të Shëngjinit ka pasur ndërprerje të energjisë elektrike.

Ndërkohë në aeroportin e Rinasit të gjitha fluturimet kanë pasur vonesa për shkak të situatës së rënduar të motit.

Autoritetet që prej ditës së djeshme vazhdojnë të bëjnë apel për shmangien e daljeve të pa nevojshme nga qytetarët dhe kujdes të shtuar nga ana e drejtuesve të mjeteve.