“ME 220 MILIONË EURO MUND TË BLINTE EDHE PALLATIN ELYSÉE”/ FEVZIU REAGON PËR ARRESTIMIN E ERMAL BEQIRIT: SI JETONTE I LIRË NË MES TË EUROPËS?

Gazetari Blendi Fevziu ka reaguar pas arrestimit në Francë të biznesmenit Ermal Beqiri, i shpallur në kërkim nga autoritetet shqiptare në kuadër të hetimeve për dosjen e AKSHI-t.

Duke komentuar pasuritë që dyshohet se i janë gjetur Beqirit në Francë, mes të cilave një kështjellë, apartamente, llogari bankare dhe një avion privat, Fevziu u shpreh se çështja më shqetësuese nuk është vetëm niveli i luksit, por mënyra se si një person në kërkim mund të jetonte i lirë në zemër të Europës.

“Me 220 milionë euro që ka marrë kompania e tij nga tenderat e AKSHI-t, mund të kishte blerë ndoshta edhe Pallatin Elysée, jo vetëm një kështjellë”, deklaroi Fevziu.

Sipas gazetarit, fakti që Beqiri qëndronte në prona të regjistruara në emrin e tij dhe përdorte lirisht pasuritë e tij ngre pikëpyetje serioze mbi funksionimin e sistemit europian të sigurisë dhe bashkëpunimin mes autoriteteve.

Fevziu ngriti dyshimin se mund të ketë pasur vetëm dy mundësi: ose biznesmeni është mbajtur nën vëzhgim për të zbuluar kontaktet dhe lidhjet e tij, ose institucionet përgjegjëse kanë dështuar ta identifikojnë dhe arrestojnë më herët.

Arrestimi i Ermal Beqirit ka rikthyer në vëmendje hetimet për kontratat dhe tenderat e AKSHI-t, si dhe burimin e pasurive të personave të përfshirë në këtë dosje.

Tashmë pritet që autoritetet të japin më shumë informacion mbi procedurat e ekstradimit, pasuritë e evidentuara në Francë dhe rolin që Beqiri dyshohet se ka pasur në çështjen nën hetim.