“Administrata Trump, e përkushtuar në zhdukjen e grupeve kriminale”/ VanHorn mesazh ministres së Brendshme Koçiu

Ambasada e Shteteve të Bashkuara në Tiranë ka shpërndarë sot një mesazh për vazhdimin e bashkëpunimit të ngushtë mes SHBA-së dhe Shqipërisë në luftën kundër krimit të organizuar dhe terrorizmit.

Përmes një postimi në rrjetin social Facebook, ambasada bëri të ditur se e Ngarkuara me Punë Nancy VanHorn zhvilloi takimin e saj të parë me Ministren e re të Punëve të Brendshme, Albana Koçiu, ku në fokus ishte angazhimi i përbashkët në çmontimin e rrjeteve kriminale dhe financiare të paligjshme.

“Sot, e Ngarkuara me Punë Nancy VanHorn theksoi edhe një herë përkushtimin e qartë të Presidentit Trump në zhdukjen e karteleve dhe grupeve kriminale ndërkombëtare gjatë takimit të saj të parë me Ministren e re të Punëve të Brendshme Albana Koçiu,” thuhet në deklaratën e ambasadës.

VanHorn vlerësoi bashkëpunimin e vazhdueshëm mes forcave të rendit të SHBA-së dhe Shqipërisë, duke theksuar se ai është thelbësor për të mohoar strehimin e sigurt për trafikantët e drogës dhe terroristët, si dhe për të rritur sigurinë e të dy vendeve.